Realak biziberrituta ekingo dio ligari
Txuri-urdinek entrenatzaile berria eta bost jokalari fitxatu dituzte, eta harrobiko gazteekin osatu dute emakumezkoen lehen taldea.
Realeko neskak eta teknikariak besarkatuta.Reala 
Denboraldiaurrea bukatuta, Realeko nesken taldeak ligari ekin dio asteburuan. Etzi, hilak 31, Madrilen zelaian ariko dira txuri-urdinak, 18:00etan. Taldea zeharo biziberritu eta eraldatu osteko aroa da abiatuko dutena. Asko dira taldea utzi duten jokalariak, eta beste horrenbeste fitxatu dituzte, harrobiaren aldeko apustua egitearekin batera. Guztira, 23 jokalari izango ditu haren aginduetara Arturo Ruiz entrenatzaile berriak.
Etorri edo ekarri dituztenak dira Ainhoa Moraza, Arola Aparicio, Maria Molina, Claudia Florentino eta Edna Imade. Bost jokalari horiekin batera, nabarmentzekoak dira lehen taldera igo dituzten harrobiko gazteak: Alazne Estensoro, Julia Arrula, Aiara Agirrezabala, Intza Egiguren eta Maren Lezeta,
Oviedo, lagun zaharra
Realeko mutilek, berriz, etxetik kanpo jokatuko dute ligako hirugarren jardunaldia. Bihar 19:00etan ariko dira Oviedoren aurka, urte askoren ondoren igo berri dena. Iraganean geratu dira haien kontra jokaturiko norgehiagokak.
Asturiarrek orain arteko bi partidak galdu dituzte, eta, beraz, txuri-urdinen kontura nahiko dute sasoiko lehen garaipena eskuratu. Realak bi puntu batu ditu Valentziaren eta Espanyolen kontra berdinduta, eta irabazteko premia du. Batez ere, jokalarien joan-etorriak zaleen artean sortu den giro nahasiari aurre egiteko.
Realaren bigarren taldeak Almeria hartuko du gaur, Anoetan (19:30). Zaragozari irabazi eta Malagaren etxean galdu ondoren, etxeko sentsazio onak eta emaitza berreskuratzea dute helburu.
