Zenbaki borobilen eta berritasunen Kontxako Bandera aurkeztu dute
130. edizioaren sailkatze estropadak irailaren 3an —emakumezkoena— eta 4an —gizonezkoena— egingo dira. Estropadak, berriz, irailaren 7an eta 14an izango dira.
Kontxako Banderaren aurkezpena, udaletxean.Inaxio Esnaola 
Donostiako uretan traineru donostiarrek lorturikoari erreparatuta, aurtengoa zenbaki borobilen Kontxako Bandera izango da. 130. edizioa da eta 75 urte bete dira hiriko klub batek gizonezkoetan bandera astindu zuenetik. Donostia Arraun Lagunak-ek laugarrena irabaz dezake, eta Donostiarra izango ote da gizonezkoen hamabosgarren bandera eskuratuko duena?
Gaur goizean aurkeztu dute Kontxako Bandera, Donostiako Udaletxean. Bestelako datuak nabarmendu dituzten arren, datorrenaren informazio praktikoaren berri eman dute. Sailkatze estropadak datorren astean jokatuko dira; irailaren 3an emakumezkoena, eta irailaren 4an gizonezkoena. Biak 18:00etan hasiko dira.
Berritasun esanguratsuena emakumezkoen kanporaketak izango du. Donostia Festak-ek araudia aldatu ondoren, Euskotren ligan postu onena lortzen duen traineru donostiarrak ez du sailkatze estropada jokatuko. Horrela, Donostia Arraun Lagunak ligako txapeldunak, haren historian lehen aldiz, zuzenean sailkatu da igandeetako lehiara. Donostiarrako neskek, berriz, kanporaketa jokatu beharko dute gainerako ontziekin batera. Zehazki, 21 traineru izango dira jokatuko dutenak, pasa den urtean baino bi gehiago.
Eneko Goia alkateak Arraunek lorturikoa goraipatu du, liga eta hainbat bandera irabazteagatik. Horrela ere, emakumezkoen traineru bateratuaren aldeko jarrera erakutsi du: “2008an bide bat ireki zen, hiriak traineru bateratua izateko. Emakumezkoetan gustatuko litzaiguke ere horrela izate, baina bi talde daudela onartzea dagokigu, eta horri erantzuteko araudia aldatu dugu”.
Gizonezkoetan ere 21 traineru ariko dira nor baino nor zazpi onenen artean sailkatzeko. Donostiarrako mutilak dira zortzigarrenak, hiriko gizonezkoen traineru bakarrak izanik, kanporaketarekin jokatuko ez dutenak.
2025eko Kontxako Banderaren kartela Joseba Larratxek egin du.
‘Itsaso handia’
130. Kontxako Banderaren kartel ederra Joseba Larratxe Josevisky ilustratzaileak egin du. Itsaso handia izenburua jarri dio, eta denbora igarotzen dela erakutsi nahi izan du. Hau da, zenbat denbora igaro den baleazaleen garaitik egun arte, eta egun kirolariek ere itsaso izugarri eta errukigabe batean lehiatzen jarraitzen dutela. Horrekin batera, hausnarketa bat ere plazaratu du: “Zer da handiagoa, arraunlarien ausardia ala itsasoa bera?”.
Xabier Leteren Itsasoan urak handi abestiarekin lotura ez badu ere, izenburu aproposa da Kontxan itsasoa harrotzen denerako. Aurreikuspenek argitzen ez badute ere, itsaso handiak nabarmen baldintzatu dezake estropada bakoitza. Ezustekoak gerta litezke; esaterako, Donostiarrak gizonezkoetan bandera irabaztea 75 urte luzeren ondoren.
Sari parekideak
Berdintasunaren aldeko konpromisoari eutsiz, sarietara bideratutako zenbatekoak berdina izaten jarraitzen du emakumeen eta gizonen modalitateetan, eta guztira 85.500 euro banatuko dira bi modalitateetan: 25.000 euroko sari ekonomikoa eta bandera jasoko dituzte lehenengo postuan sailkatutako tripulazioek. Gainera, tripulazio irabazleen arraunlari bakoitzak banderaren miniaturako erreplika bat jasoko du, estropadan izandako parte hartzea gogorarazteko.
