Klik-klak
Beldurrezko hanburgesak eta 'Blade Runner'
Kar, kar, kar! Hanburgesa bat beldurrezkoa? Alegia, beldurra ematen duen hanburgesa bat? Zer izango da hurrena? Herritarrengandik gertu dagoen alkate bat? Kutsatzen ez duen errauskailu bat? Elkar ados jartzen den ezker bat? Gabonetako paga estrak estra direla sinetsarazi nahi duen nagusi bat? Parte hartze prozesu bat herritarrekin eginda eta herritarrek nahi dutenerako? Egoak jan egiten ez duen artista bat? Ezertarako balio ez duen mito bat?
Nire lagun on-on batek askotan oroitzen du Blade Runner: «Sinistuko ez zenituzten gauzak ikusi ditut nik. Orionetik harago espaziontziak su hartzen…». Jada ez gara harritzen ezeren aurrean, eta horregatik, akaso, ez gara asaldatzen. Eta ez dugu elkarrekin asaltuz hartzen ezta Cristina Eneako kartel txatxu hori ere ez. Noiz hasten da hiria geuretzat berreskuratzeko garaia?
