Herrerako futbol zelaia berritzeko aurrekontua 3 milioi eurokoa izango da
Herrerako futbol zelaia. 
Donostiako Udalak Herrerako futbol zelaia birmoldatzeko proiektua onartu du, 3.048.936 euroko aurrekontuarekin eta zazpi hilabeteko egikaritze epearekin. Proiektuaren helburua da zelaia osorik birmoldatzea, gaur egun hondatuta dauden kirol instalazioak berreskuratzeko eta horiei balioa emateko.
Bi fasetan banatu dute proiektua: lehena, jokalekuari dagokiona, eta, bigarrena, aldagelek eta harmailen egokitzapenarena. Proiektatutako esku hartzearen barruan sartzen da dagoen soropil artifizialaren ordez bosgarren belaunaldiko betelanik gabeko sistema bat jartzea. Sistema hori bere iraunkortasunagatik, mantentze lanen murrizketagatik eta hondakin plastikoak sor ditzaketen betelanetarako materialik ezagatik nabarmentzen da.
Ureztatze eta drainatze sistema eta argiztapen instalazioa erabat berrituko dira. Urbanizazio perimetral berri bat egingo da, eta, bertan, zoladurak, landa itxitura berria eta aparkalekutik iristeko moduko arrapalak sartuko dira. Era berean, zelaiaren sarrera zaharraren arkuzko egituraren ingurua garbituko da, sarrera horren sinbolo historikoa baita.
Harmailetako euste hormari atxikita dauden gaur egungo aldagelak erabat eraitsiko dira. Aldagela berrien oinplanoko eskema luzetarako izango da, tribunaren hormari atxikita, eta sarrera nagusia egungoaren alde berean egongo da. Sei aldagela egingo dira, luzetarako erdiko korridorearen alde banatan hiru, sarrera errazteko.
