Izaroren doinuek eta drone ikuskizunak piztu dituzte Gabonak
Droneek hiriari lotutako zenbait irudi sortu dituzte, baina Gabonetako tradizioei lotuak ere.Maitane Aldanondo 
Gabonetako argiak pizteko ekitaldia egin dute ostiral arratsaldean Alderdi Ederren. Azken urteotan bezala, Donostia Sustapena udal sozietateak herritar askoren jakin mina piztu duen ikuskizun berezi bat antolatu du. Hasiera ordua baino hiru ordu laurden lehenago inguruan jende ugari bazegoen, ordua gerturatu ahala, gero eta gehiago izan dira bertaratutakoak.
Argiak itzali eta Izaro irten da terrazaren erdira. Izaro Gabonetan diskoko bi abesti kantatu ditu Gure gabon gaua eta Olentzero. Bien artean Olentzero eta Mari Domingiri egingo dien eskaera partekatu du: “Donostia bizigarri eta euskaldun bat donostiarrentzat”. Eskerrak eman eta agurtuta, berriro itzali dituzte argiak. Izan ere, badia gainean hastekoa zen drone ikuskizuna. Iaz 300 izan baziren, aurten 500 baliatu dituzte.
Donostia ametsetan izenburupean, hiriaren historia eta izaeraren adierazgarri diren zenbait irudi sortzen joan dira robot hegalariak. Itsasorako joera, 1813ko sutea, hiriaren eraikuntza esanguratsuak, gastronomia, Zinemaldia, arrauna… eta garaiari lotutako tradizioa: Olentzero eta Mari Domingi. Bakoitzari lotuta, azalpen laburrak eman dituzte elebitan, istorioa josteko. Gaztelerazko ahotsa erraz ezagutuko zuten askok: Iñaki Gabilondo kazetariarena zen. Hain justu, berak izan du aurten argiak pizten dituen botoia sakatzeko ardura, bere ibilbidearen parte izan zen Radio San Sebastian irrati katearen mendeurrenean.
Atzera kontatu dute hamarretik hasita, sakatu du botoia Gabilondok esan duenean, baina garaiaren magiak bultzatuta edo, zanpatu aurretik, “bat” oihukatzen ari zela udaletxe aurreko jendetza, fatxada kolorez bete da. Umorez hartu du protagonistak eta barre egin dute ere albo banatan zituen Jon Insausti alkatea eta Ane Oiarbide alkateordea. Batera edo bestera, Eguberria piztu da hiriko kaleetan.
