Su eten «faltsua» gaitzetsi eta mobilizatzen jarraitzera deitu du Palestinarekin Elkartasunak
Mc Donald's jatetxearen aurrean geldialdia egin dute enpresa estatubatuarraren konplizitatea salatzeko.Maitane Aldanondo 
Palestinako Herriarekiko Elkartasunaren Nazioarteko Egunean, Palestinarekin Elkartasuna plataformak deituta, dozenaka lagunek bat egin dute “su etenaren faltsutasuna eta nazioarteko erakundeen konplizitatea” gaitzesteko aurrera eramandako manifestazioarekin. Eguerdia pasata, Parte Zaharreko kaleetan barrena zabaldu dituzte Palestinaren aldeko eta Israelen aurkako aldarriak. Bulebarreko abiapuntura bidean, geldialdia egin dute Mc Donald’s jatetxearen aurrean, enpresa estatubatuarra genozidioaren konplizeetako bat dela salatzeko.
Kioskora iristean, partaideek borobil erdia osatu, eta eragileak prestatutako idatzi irakurri dute bi kidek. Lehen hitzak, hala ere, goizean Beasaingo CAF enpresaren ate nagusian beren burua kateatu duten zortzi ekintzaileentzat izan dira, “ekintza zuzena ere aplikatzeagatik, mobilizazioaz gain”. Izan ere, Palestinar eremuaren anexioa ahalbidetzeko “ezinbesteko tresna” dira koloniak hornitzeko eraikitako azpiegitura iraunkorrak, eta horietako bat da CAF egiten ari den trenbidea. Hortaz, beste behin errepikatu dute genozidioarekin dirua egiten duten horien aurka presionatzen jarraitzeko beharra.
Su etena sinatu eta ia bi hilabetera, Israelek baldintzak lehen unetik urratu dituela deitoratu du plataformak. Izan ere, bonbardaketak, erailketak eta blokeoak mantendu ditu Israelek, ia 500 palestinar erail eta milaka zauritu eraginda. Gainera, Zisjordanian 1.300 etxebizitza eraikitzeko plana aurkeztu du gobernu sionistak eta “inpunitate osoz” tortura kasuek biderkatzen jarraitzen dutela gogoratu dute, baita palestinarren aurkako heriotz zigorra legeztatu nahi duela ere. “Hau da sionistek AEBen eskutik eta Mendebaldeko agintarien konplizitatearekin su eten gisa saldu nahi digutena”.
Irtenbide “faltsua”
Azaldu dutenez, Trumpen plana deiturikoak garbiketa etnikoa mantentzea du helburu, israeldarren erasoak baimendu eta estaltzen baititu eta palestina erresistentzia ez erantzutera derrigotzen duelako. Hori horrela, “sarraskiaren ala pixkanakako genozidioaren artean” aukeratu behar dute palestinarrek.
78 urte bete dira gaur NBEk partizio plana onartu zuenetik eta bi estatuen irtenbidea “faltsua” izan zela inoiz baino argiago ikus daitekeela nabarmendu dute hizlariek, “Israel legitimatzeko eta palestinar herria zokoratzeko trikimailua baino ez da izan. Soluzioa beharrean, arazoaren iturria da”. 1947an lurren %56 jaso bazuten sionistek, egun lurralde osoaren %80 baino gehiago kontrolatzen dute eta Zisjordanian anexio plan berriak onartu dituzte. Are gehiago, sionistek “konplexurik gabe” adierazi dute haien asmoa “garbiketa etnikoa gauzatzea” dela, palestinarrei bi aukera emanez: alde egitea ala hiltzea.
Hortaz, Israelen desegitea aldarrikatu dute, “proiektu sionista existitzen den bitartean ezingo baita Palestina askerik izan”. Horregatik, Plaestina historiko osoaren dekolonizazioa eskatu dute, “ibaitik itsasora”, eta su eten “faltsuak” desmobilizazioa helburu duela jakitun, herri palestinarraren eta bere erresistentziaren alde mobilizatzen jarraitzeko eskatu dute, konplizeen aurka ere eginez harreman oro eten arte.
