Venezuelaren aurkako eraso inperialista salatu dute ehunka lagunek Donostian
Hegoak Elkartasun Plataformak deituta, ehunka herritar elkarretaratu dira igande goizean Alderdi Ederren, Venezuelari babesa helarazteko eta AEBen inperialismoa salatzeko.Beñat Parra 
Hego Euskal Herriko hainbat eragile sozial, sindikal eta politiko biltzen dituen Hegoak Elkartasun Plataformak deituta, elkarretaratze jendetsua egin dute Alderdi Ederren igande eguerdian (hilak 4) Donald Trump ultraeskuindarra buru duten Amerikako Estatu Batuetako armadak Venezuelako subiranotasunaren aurka egindako eraso inperialista salatzeko eta Venezuelaren burujabetza aldarrikatzeko.
Donostian ez ezik, Hego Euskal Herriko gainontzeko hiriburuetan ere egin dituzte mobilizazioak gaurkoan, Hegoak-ek deituta. Era berean, Venezuelaren aldeko eta AEBen erasoaren aurkako beste bi mobilizazio egin zituzten larunbat arratsaldean Donostian: 18:00etan, hainbat eragile internazionalistek deituta Bulebarrean eta, 19:00etan, Euskal Herriko Kontseilu Sozialistak deituta, leku berean.
Euskal Herriko hainbat eragile internazionalistek deituta, elkarretaratzea egin zuten larunbat arratsaldean Bulebarrean, Venezuelaren alde eta AEBen inperialismoaren aurka.Jardun
Euskal Herriko Kontseilu Sozialistak deituta, elkarretaratzea egin zuten larunbat arratsaldean Bulebarrean, Venezuelaren alde eta AEBen inperialismoaren aurka.EHKS
Gogoratu behar da AEBetako armadak Venezuelako hiriburu Caracas eraso zuela larunbat goizaldean, baita Nicolas Maduro presidentea eta haren emazte Cilia Flores bahitu ere, aldebakarrez, nazioarteko legedia urratuz. New Yorken dituzte gatibu biak oraingoz, eta narkotrafikoagatik eta ustelkeriagatik epaitu nahi dituzte. Trumpek, larunbat arratsaldean egindako prentsaurrekoan, injerentzia militarra goraipatzearekin batera, argi esan zuen Venezuela “zuzenduko” dutela AEBek, “trantsizio seguru bat” egin daitekeela baieztatu arte, baita kapital estatubatuarra sartuko dutela Venezuelako petrolioan —munduko erreserba handienak daude bertan—. Era berean, AEBen inperialismoari aurre egiten dioten beste herrialde batzuk mehatxatu zituen Trumpek, hala nola, Kuba.
Hegoak-ek “oso larritzat” jo du AEBen erasoa: “Lehen aldiz, AEBetako armadak lurralde venezuelarra eraso du, jendarte zibilaren artean biktimak eraginez. Hori gutxi ez eta Venezuelako presidente Nicolas Maduro bahitu eta herrialdetik atera du bere emaztearekin batera. Gertakari hauek guztiz neurrigabeak dira eta ez dituzte inondik inora nazioarteko legedia eta Nazio Batuen Erakundearen Karta errespetatzen”. “Hegoak plataformatik munduko herri eta pertsona guztien burujabetza aldarrikatuko dugu ezinbesteko printzipio gisa. Inork ezin du venezuelar herriaren gaineko erabakirik hartu, hori venezuelar herriari soilik dagokio eta ez beste inori”, gaineratu dute.
Hegoak Elkartasun Plataformak deituta, ehunka herritar elkarretaratu dira igande goizean Alderdi Ederren, Venezuelari babesa helarazteko eta AEBen inperialismoa salatzeko.Beñat Parra
Neokolonialismoa
Trumpen gobernua “munduko herrien aurkako estrategia neokolonial bat” ezartzen ari dela gaitzetsi du Hegoak plataformak: “Estrategia hori esku hartzeetan, mehatxuetan, xantaian eta eraso militarretan oinarritzen da, bereziki Palestinan, Latinoamerikan eta Karibean eragin handia izanik”.
Era berean, nabarmendu dute estrategia horrek harreman zuzena daukala interes ekonomikoekin: “Jarrera hori AEBetako administrazioa osatzen duten multinazionalen interesei lotuta dago, zeinak menpekotasun ekonomikorako estrategia oldarkor batekin, presio politikoekin eta indar militarraren erabileraren mehatxuarekin konprometituta dauden. Monroe Doktrinaren eguneratzeak, diskurtso belizista kezkagarri batez lagunduta, erasoa eta xantaia normalizatu nahi ditu Washingtonen eta kontinentearen arteko harremanean”.
Hegoak Elkartasun Plataformak deituta, ehunka herritar elkarretaratu dira igande goizean Alderdi Ederren, Venezuelari babesa helarazteko eta AEBen inperialismoa salatzeko.Beñat Parra
Horrez gain, Maduroren eta Floresen askatasuna aldarrikatu dute: “Arreta berezia jarri nahi dugu Nicolas Maduro presidentearen eta bere emaztearen bahiketan. Guztiz onartezina da eta ez du inondik inora laguntzen egoera konpontzen. Maduro Venezuelara itzuli eta aske uztea behar beharrezkoa da egoera bideratu ahal izateko”.
“Venezuelako herriarekin elkartasuna” adieraziz amaitu dute mobilizazioa, baita “haien autodeterminazioa, instituzioak, subiranotasuna eta lurralde osotasuna errespetatzeko” eskatuz ere. “Herrialdearen aurkako eraso militarrek mehatxu larria dakarte Latinoamerikako eta mundu mailako bakearen eta egonkortasunaren eraikuntzan; horregatik, nazioarteko komunitateari exijitzen diogu eraso hauek salatu eta neurri zorrotzak har ditzan”, gaineratu dute.
