Zardoya eremuko etxebizitzak eraitsi ahal izateko agindua eman du Jon Insausti alkateak
Herrerako Zardoya eremua.Joseba Parron San Sebastian 
Azken egunetan, Herrerako Zardoya eremuan izan diren “gertakariei” aurre egiteko neurria iragarri du Jon Insausti alkateak, Tokiko Gobernu Batzordean. Gaur goizean “agindua” eman du Zardoyako pabiloiak eraisteko. Gogoratu behar da eremu horretako eraikin zaharretan 140 pertsona inguru bizi direla.
“Gaur arratsaldean txostenak bukatu ondoren, bihar goizerako lizentziak prest egongo dira. Beraz, eraikinen jabeak erabateko ahalmena izango du eraikinak botatzeko”, azaldu du Insaustik. Horrekin batera, gogoratu du eremu horretarako “berroneratze proiektu bat” martxan dagoela, hiru-lau fasetan egingo dena. “Horrekin aurrera jarraitzeko, pabiloiak eraitsi behar dira”, gaineratu du alkateak.
Udalbatzak iazko iraileko udalbatzarrean eman zion oniritzia Zardoyako hirigintza garapenari. EAJk, PSE-EEk eta PPk bozkatu zuten proiektuaren alde, eta kontra agertu ziren EH Bildu eta Elkarrekin Donostia.
Baimen eskaera, urrian
Herripe auzo elkarteak hedabide honi jakinarazi dionez, Zardoya eremuko eraikin zaharren jabea Barelis izeneko enpresa da. “Eraikinak eraisteko baimena urrian eskatu zioten udalari, eta eremua husteko gomendioa eman zioten. Orain, pentsatzen dugu, alkateak iragarri duena dela baimen hori eskatzaileei eman dietela”, adierazi du auzo elkarteak.
Bihar, hilak 8, Herripek Zardoya eremuko hirigintza planari aurkezturiko alegazioen aurkezpena egingo du, Harrobieta plazan, Udalinfok duen bulegoan (18:00). Alegazioen ildo nagusiak zeintzuk diren aurreratu dute: “Dagozkigun eremu berdeak Erregeneako eremuan kokatzea, eremuaren eraikigarritasunak beharrei erantzutea edo batzuen negozioa sustatzea, mugikortasun arazoak etxebizitza kopuruagatik, zuzkidura etxebizitza eskasia eta definizio eza, eta inguruko auzuneetan eta etxeetan sortzen dituen kalteak”.
Bestalde, bihar ere, auzo elkarteak Erregeneari buruz landu duen txostena aurkeztuko du Herrera Kirol Elkartean, 19:00etan.
