Auzoa eraldatzeko esku hartzeen proposamena aurkeztu du udalak
Aurrera eramandako partaidetza prozesuaren emaitza den Plan Berezia aurkeztu die auzotarrei udalak. Kontrako ahots batzuk badira ere, orokorrean, proposamenarekin ados daude auzo elkarteko kideak.
Ikastolaren inguruko segurtasuna bermatzeko zenbait neurri biltzen ditu, besteak beste, udalaren proposamenak.Arantzazuko Ama Ikastola 
Martutene berria sortzetik gertuago dago. Trinketean eta gasolindegia zen inguruan gauzatuko diren hirigintza garapenek auzoa eraldatzeko aukera ekarri dute; eta nolakoa beharko lukeen entzun eta etorkizuneko ingurua erabakitzeko, udalak partaidetza prozesua abiatu zuten 2024ko irailean. Haren emaitza den proposamena, berriz, Mugikortasun eta Hirigintza sailek osatu dute, eta joan den asteazkenean, urtarrilak 28, aurkeztu zieten auzotarrei. Bileran, Mugikortasun eta Garraio Iraunkorreko zinegotzi Olatz Yarza, Hirigintza Plangintza eta Etxebizitzakoa, Nekane Arzallus, eta Auzoetako eta Herritarren Partaidetzakoa, Idoia Gracia izan ziren.
Prozesuan parte hartu duten auzoko eragileak eta norbanakoak, oro har, pozik daudela dio Sarroeta auzo elkarteko lehendakari Maite Barronek, premiazko beharrei erantzun zaiela uste baitute. Prozesuari dagokionean ere, batetik, «ona» baita entzunak izatea, eta bestetik, Plan Berezi batean sartu duelako udalak, HAPOtik bereizita, denboran luzatzea saihestuta. Gobernu Batzarraren hasierako onarpena apirilerako aurreikusten dute, udalbatzarrean behin betiko onartu ahal izateko irailean edo urrian.
Segurtasuna, lehentasun
Erabakiei dagokienean, Martutene pasealekua auzo barneko trafikorako utzita, Tranbia kalea izango da ibilgailuen ardatz nagusia. Bide ardatz berri hori trafiko motelekoa izango da, 30 km/h, eta zebra bide goratuak eta Dbusen hiru geltoki izango ditu, trafikoa mantsotzeko. Gainera, ibilgailuak Tranbia kalera bideratzeko, egungo chicane modukoa kenduko dute, oinezkoentzat arrisku eremu bat kenduz eta gune seguru handi bat irabazita. Neurria, ordea, ez da denen gustukoa. Kale horretako bizilagunak kexu direla dio Barronek, «beren ahotsa ez dela entzun» uste baitute. Ulertu arren, zehaztu du ez dela egungo Martutene pasealekuaren berdina izango, espaloi zabalak —bi eta hiru metrokoak— eta trafikoa oztopatzeko elementuak izango baititu, «pasabide moduan erabiltzen duenak, auzo kanpoko errepide nagusia har dezan».
Bizilagunen eskakizun nagusietako bat Arantzazuko Ama ikastola inguruko bide segurtasuna hobetzea zen. Izan ere, lau aldeetatik errepidez inguratuta dago eta Martutene pasealekua errepide «nahiko garrantzitsua» da. «Aspalditik eskatzen genuen hori hobetzea», zehaztu du Barronek, baita ikastolaren izkina batean dagoen bihurgune «oso arriskutsua» kentzea ere. Proiektua gauzatzean, aurrealde osoa oinezkoentzat izango da. Guraso elkartea oso gainean egon da eta «oso positibotzat» jo du proposamena. «Gure haurrak erdigunean jartzen dituela pentsatzen dugu eta, era berean, auzorako onura handiak ekarriko dituela, hainbat arnasgune sortuz».
Zerbitzu falta
Moldaketa horren ondorioz, Marie Curie parkea 1.304 metro koadro handituko da, eraikin berriraino eta ikastolako hesiraino zabalduta. Halaber, plaza berri bat sortuko dute, gutxi gorabehera 2.037 metro koadrokoa, ikastolaren pista estaliaren aurrean, eraikin berriaren beheko solairuko portxe edo arkupe aurrean. Hala, jaiak eta beste jarduera batzuk egin ahal izateko behar zuten zabalgunea izango dute auzoko eragileek. Aipatu portxe edo arkupeek, gainera, erabilera publikoko 288 metro koadroko azalera izango dute.
Yarzak aurkezpenean nabarmendu zuenez, «hiriko erdiguneko estandarrak» aplikatu dituzte Martutenen, trafikoa gutxituz eta alboratuz, eta auzoaren erdigunean disfrutatzeko oinezkoen espazioa sortuz». Alegia, aisialdirako berdeguneak, jolas guneak dituzten plaza berriak, oinezkoentzako kaleak, bidegorriaren lotura zatia, merkataritza lokal berriak eta ekipamendua ekarriko ditu plan berriak.
Esan bezala, auzoko eragileak proposamenarekin bat badatoz ere, oraindik ere zer hobetu badela berretsi dute. Ehun etxebizitza berri eraikiko dituzte eta zerbitzu publiko «berak eta eskasak» izaten jarraitzen dute. «Ez dugu kirol ekipamendurik, anbulatorio eskasa…», autobus maiztasuna hobetzea nahi dute, «pila bat tardatzen du», baina Yarzak esan die «defizitarioa dela eta ez dituela hobekuntzak aurreikusten», nahiz eta 26. linea erabilienetakoa den. «Gehiago izango bagara, zerbitzuak behar ditugu. Zerbitzu falta nabarmena izango dugu datozen urteetan, ez bada ezer egiten», eskatu du Barronek.
