«Denok bat egin dugu bide beretik joateko, eta hori zelaian nabaritzen da»
Minutuak jokatu ahala, golak egiteko gogotsu dago Mirari Uria (Azpeitia, 2003). Realaren puntako aurrelari bakarra da, Edna Imadek urtarrilean kluba utzi zuenetik. Ondorioz, askoz ere gehiago jokatzen ari da gipuzkoarra, eta momentua aprobetxatu nahi du.
Mirari Uria Realeko aurrelari azpeitiarra.Inaxio Esnaola 
Asteburuan irabazteak asteko entrenamenduak alaitzen ditu. Derbia irabazita, are gehiago?
Bai, noski. Kopatik kanpo geratu ondoren, hausnarketa bat egin genuen, mingarria izan zelako. Liga soilik dugu jokoan, eta argi genuen irabaziz egingo geniola aurre izandako galerari. Badalonari ligako partidan bai irabazi geniola, eta Lezamako euskal derbirako oso gogotsu geunden. Ondo irabazi genuenez [0-2], aste pozgarria izan da, bai.
Bistan da presente duzuela kopan gertaturikoa. Ordea, taldeak aise eman dio buelta, ezta?
Gogorra izan zen guretzat partida hura galtzea, baita galtzeko modua ere. Ez genuen asmatu, ondo aritu ginen arren. Halere, Badalonaren kontra kopan galdutakoa, ligako neurketan berreskuratu genuen. Gai izan ginen egoera irauli, lehiakorragoak izan, maila hobea eman eta garena erakutsiz irabazteko.
Ligan denboraldi bikaina egiten ari zarete. Txapeldunen Liga jokatzeko postuetan egonkortu zarete, eta zortzi puntura dago hurrengo taldea. Zer aldatu da pasa den sasoitik hona?
Taldeak eta jokalariok konfiantza handiagoa daukagu. Denok bat egin dugu bide beretik joateko, eta hori zelaian nabaritzen da. Gure nortasuna topatu dugu, eta horrek asko lagundu digu.
Orain arte lorturikoa espero zenuten?
Nahi genuen, baina aurreko bi sasoi irregularrak aintzat hartuta, oinak lurrean genituen. Bagenekien zaila izango zela onenen pare egotea, eta ez gabiltza oso urrun. Egunerokoari eta partida bakoitzari garrantzi gehiago ematearen ondorioa ere badela esango nuke.
Arturo Ruiz entrenatzaileak zenbateraino aldatu du taldea?
Nire ustez, taldea josi eta lehiakorra izatea lortu du. Indibidualki kalitate oneko taldea izan gara azken urteotan, jokalari onak ditugulako. Ordea, taldea osatzea eta talde gisa jokatzea falta izan zaigula uste dut. Konfiantza aldetik ere baxuago egon gara. Pixkanaka, Arturorekin lortu dugu gabezia horiei buelta ematea. Batez ere, kalitatezko entrenamenduak eginez. Aldaketa nabaria izan da, eta oso lagungarria egungo Reala eraikitzeko.
Jokatzeko moduan ere nabari da entrenatzailearen lana?
Bai, beste era batera jokatzen dugulako. Arturori ez zaio arriskuak hartzea gustatzen, eta defentsa sendo bat lehenesten du erasoan eraginkorragoak izateko. Aurretik, baloia atzetik atera eta mugitzen genuen. Orain, ordea, pase bakoitzak du garrantzia arerioaren atera iritsi eta golak egiteko.
Denboraldia hasi aurretik, Ainhoa Moraza elkarrizketatu genuen. Klubak nesken taldea indartu eta orekatu zuela adierazi zigun. Eskarmentudun jokalariekin eta gazteen aldeko apustu garbiarekin. Ados zaude?
Erabat, gainera. Nik nire esperientziatik bizi izan dudan zerbait da. Bigarren taldetik lehenengora igo nintzenetik, sekulako aldaketa egon da klubean. Jauzi hori asko txikitu da, igotzen denak berehala ematen duelako maila ona. Horren eredu dira Aiara Agirrezabala eta Intza Egiguren, besteak beste. Realak harrobiarekiko konpromisoa areagotu du, baliabide gehiago jarri dituztelako jokalarien formaziorako.
2026. urte hasiera, berriz, malkartsu samarra izan zen, taldeak bi jokalari gutxiagorekin egin zuelako aurrera. Edna Imaderen agurrak zalantzak sortu zituen zaleen artean. Ordea, klubak ez zuen ordezkorik ekarri eta zeudenei garrantzia eman die. Tartean, zuri. Nola bizi izan duzu hori?
Egia esan, pozik nago, ezin dut ukatu. Gabonak bitarte oso minutu gutxi jokatu nituen, eta Ednak taldea utzi zuenetik, aukera gehiago izaten ari naiz. Hasieratik izan dut entrenatzailearen konfiantza, eta lanean jarraituz gero, nire aukerak izango nituela esan zidan. Ordea, Edna oso maila onean aritu da Realarekin, eta banekien nik berak baino askoz gutxiago jokatuko nuela. Zoritxarrez edo zorionez, Edna joan egin zen, eta, orain, gehiago jokatzen ari naiz.
Mirari Uria aurrelaria, Eibarren kontra jokaturiko partida batean.Reala
Orain da zure momentua?
Tira, oraindik egoera kudeatzen, konfiantza areagotzen eta erritmoa hartzen nabil. Ez da erraza minutu oso gutxi jokatzetik ia partida oso baten erritmoari eustea. Zorionez, gogor aritu nintzen entrenamenduetan denboraldiaurretik Gabonak bitarte, aukera izatean prest egoteko. Eta, bai, orain da momentua.
Puntako aurrelariei dagokienez, zu zara orain Realeko bakarra?
Bai, baina nire lekuan jokatu dezaketen beste jokalari onak ere badaude. Esaterako, Claire Lavogez, Nerea Eizagirre eta Lucia Pardo. Ez dira puntako aurrelariak, baina leku horretan joka dezakete.
Azken urteotan, puntako aurrelari on asko izan ditu Realak, eta klubetik joan dira izandako maila apartarengatik. Amaiur Sarriegi, Synne Jensen eta Imade bera aipa ditzakegu. Orain, Mirari da erreferentzia.
Aukera aprobetxatzen ahaleginduko naiz, eta, batez ere, golak egiten [barrez]. Hori da falta zaidan gauza bakarra, baina badakit gol bat egin orduko etorriko direla besteak.
Ligak ez du etenik, eta sailkapeneko hirugarren tokiari eusteko irabazten jarraitu behar duzue. Prest zaudete erronka horri eutsi eta Txapeldunen Ligara sailkatzeko?
Gure helburu bakarra oraintxe Espanyoli irabaztea da. Ez dugu buruan Txapeldunen Liga. Lehentasuna da egunerokoa oso ona izatea, eta hurrengo partidari erabateko garrantzia ematea.
