Hondartzetan erretzea eta bozgorailuak erabiltzea debekatuko du udalak
Aldatuko ez dena da bainu garaian hondartzetan maskotekin sartzeko debekua. Hau da, bere horretan mantenduko da.
Bi zigarrokin, Kontxako hondartzan. Joseba Parron San Sebastian 
Donostiako Udala hondartzen ordenantza aldatzen ari da, udatik aurrera bi debeku ezartzeko: erretzea eta bozgorailuak zein soinua sortzen duten gailuak erabiltzea. Aldatuko ez dena da bainu garaian hondartzetan maskotekin sartzeko debekua. Hau da, bere horretan mantenduko da, ekainaren 1etik irailaren 30era bitarteko tartean.
Iragan azaroan, udaleko Osasun eta Ingurumen Sailak araudia aldatzeko hasierako proposamena aurkeztu zuen. Proposamen horretan, hiru neurri nagusi jasotzen ziren: erretzea debekatzea, zigarrokinek eragindako kutsadura murrizteko eta kerik gabeko espazioak sustatzeko; zarata sortzen duten gailuak mugatzea, erabiltzaileen ongizate akustikoa eta lasaitasuna bermatzeko; eta urte guztian txakurrek hondartzetan sartzeko modua izatea, Etxeko Animaliak Babesteko Euskal Legera egokituta.
Proposamena herritarrek kontsultatzeko moduan jarri ondoren, erabaki da lehenengo bi neurriekin aurrera jarraitzea eta maskoten sarbideari buruzkoa etenik uztea. “Araudian aldaketa hori egitea planteatu genuen, sinetsirik hiriarentzat positiboa zela eztabaida hori irekitzea. Uste genuen gaiak interes eta jarrera desberdinak sortuko zituela, eta horrexegatik erabaki genuen jendaurrean jartzea. Benetako parte-hartzean sinesten dugu, ez izapide gisa, baizik eta erabakietan eragina izango duen tresna gisa”, adierazi du Iñigo Garcia Ingurumeneko zinegotziak.
Herritarren partaidetza
Parte hartzeko prozesuak agerian utzi du gehiengoa ez dagoela bainu garaian txakurrak hondartzetara sartzen uztearen alde. Erregistratutako 163 proposamenetatik, %85,8 kontra agertu dira, %4,9 alde, eta %9,2 ez kontra eta ez alde. Emaitza argi hori aintzat hartuta, udalak bere gain hartu du herritarren mandatua eta gobernu ekintzan txertatu du.
Hondartzetan erretzeko debekuak, ostera, babes argia izan du: jasotako 51 proposamenetatik, %72,5 neurriaren alde agertu dira. Era berean, ia erabateko babesa izan du bozgorailuek edo beste gailu batzuek ateratzen duten zarata gogaikarria saihesteko proposamenak: erregistratutako 37 ekarpenetatik, %97 alde agertu dira, eta ez da kontrako botorik izan.
Urratsez urrats
Jendaurrean jartzeko eta aztertzeko epea amaitu ondoren, proposamena astearte honetan onetsiko da, Tokiko Gobernu Batzarrean, eta gero batzordeetara igorriko da, talde politikoen proposamenak jaso eta eztabaidatzeko. Adosten diren ekarpenak batzordean onetsiko den irizpenean sartuko dira.
Irizpen hori udalbatzari aurkeztuko zaio, hasierako onespena eman diezaion eta ondoren Gipuzkoako Aldizkari Ofizialean argitara dadin. Horren ostean, araudi berria jendaurrean jartzeko epea irekiko da, alegazioak aurkeztu ahal izan daitezen.
Azkenik, aurkeztutako alegazioak ebatzi ondoren, araudia behin betiko onetsiko da, eta ordutik aurrera indarrean sartuko da erabat. 2026ko hondartza garairako —ekainaren 1ean hasiko da– onetsita egotea da asmoa.
