San Sebastian eguneko bandera jaso du Euskal Billerak
Jon Insausti alkateak eman die bandera Euskal Billera elkarteko ordezkariei. 
Azken urteotan egin duen moduan, Donostiako Udalak hiriko elkarte bati eman dio San Sebastian Plaza Berrian zintzilik egon zen bandera, omenaldi gisara. Aurten, Parte Zaharreko Euskal Billera elkarteak jaso du bandera brodatu eta pertsonalizatua, gaur (hilak 24), Jon Insausti alkatearen eskutik.
“Ekimen hau 2020tik egiten den aitorpen instituzionala da, eta hiriko gizarte eta jai bizitzarekin lotutako erakundeei ematen zaie eta, oraingo honetan, bandera elkarte horri eman zaio bere 125. urteurrena dela eta”, azaldu du udalak. Ekitaldian, Insaustik nabarmendu du hiriarentzat “ohore bat” dela “Euskal Billeraren moduko erakundeak izatea, gure sustraiei eusten jakin dutenak eta, aldi berean, hiriari ekarpen garrantzitsuak egin dizkiotenak, hala nola haurren danborrada sortzea, zeinarekin milaka haur donostiarrek gure tradizioez gozatzearen garrantzia ikasi dugun”.
2026ko San Sebastian eguneko bandera “bereziki berezia” dela gehitu du alkateak, Plaza Berrian “egin zen lehenengo igoeraren 100. urteurrenaren ospakizunean jaso den bandera baita”.
Dagoeneko, sei bandera eman ditu udalak: Union Artesana (2020), Donostialdea ESI (2021), Artzak Ortzeok (2023), Loiolatarra (2024), Club Vasco de Camping (2025) eta Euskal Billera (2026); 2022an ez zen banderarik eman, pandemia dela eta.
Jon Insausti alkateak eman die bandera Euskal Billera elkarteko ordezkariei.
125 urteko historia
“Bere historian zehar, Euskal Billerak funtsezko papera bete du Donostiako tradizioen kontserbazioan, transmisioan eta sendotzean, eta bereziki danborradaren garapen eta indartzean. Elkartea erreferente izan da festan parte hartze aktiboan, eta bere izaera herrikoia, nortasun kulturala eta hiriarekiko lotura bizirik mantentzen lagundu du”, nabarmendu du Donostiako Udalak.
Hain zuzen ere, elkarte horrek sortu zuen, 1927an, haur danborrada: “Ekimen aitzindari hark haurren parte hartzearen oinarriak ezarri zituen ospakizunean, eta jaiaren belaunaldien jarraipena bermatu zuen, denboraren poderioz San Sebastian eguneko ekitaldi maitatu eta enblematikoenetako bat bihurtuz”, azaldu du udalak.
