Udalak itxitako kioskoak lehiaketara aterako ditu, eta inork hartu ezean, kaletik erretiratu
Rosi kioskoa itxita.Naike Usabiaga 
Donostiako Udala, azken hilabeteetan, hiriko kioskoen egoera aztertzen ari da, batez ere kalean dauden prentsa saltokiei begira. Ondare saila prestatzen ari den txostenaren helburua argia da: zein kiosko dauden martxan jakin, inbentario eguneratua osatu eta hutsik daudenak berriro merkatura ateratzea.
Gaur egun, bederatzi kiosko daude hirian sakabanatuta, gehienak Erdialdean eta Parte Zaharrean. Horietatik sei irekita daude, baina beste hiruk ez dute jarduerarik. Duela gutxi arte laugarren bat ere bazegoen itxita, Donostia Ospitalearen Arantzazu eraikinaren sarreran; hori, ordea, duela egun gutxi kendu du Udaleko Mantentze Zerbitzuak.
Udalaren asmoa da itxita dauden hiru kiosko horiek berriz martxan jartzea. Horretarako, aurten bertan lehiaketa publiko bidez aterako dute haien kudeaketa. Zehazki, honako kokaleku hauetan daude hutsik dauden kioskoak: Askatasunaren Hiribidea 10ean, Ategorrieta 71n eta Bidebietako Julio Urkijo pasealekuan, 24. zenbakian.
Hala ere, baliteke prozesu horiek ez betetzea. Interesdunik agertzen ez bada, udalak kioskoak kentzea erabakiko du, ospitalearen sarrerakoarekin egin duen moduan. Bestalde, eskaera bat baino gehiago egonez gero, zozketa bidez erabakiko da nork eskuratuko duen baimena.
Kiosko gehienak 1990eko hamarkadan jarri ziren martxan, kaleko prentsa salmenta arautu zenean. Ordutik hona, ordea, kontsumo ohiturak asko aldatu dira, eta horrek eragin zuzena izan du jardueran: saltzaile askok utzi egin dute negozioa. Gaur egun, kiosko bat ustiatzeko baimena lortzeko ezinbestekoa da udal lehiaketa batean parte hartzea, eta ez dirudi epe motzean araudia aldatzeko asmorik dagoenik.
