Bergerren irakurraldia egingo dute Tabakaleran Jone Laspiurrek, Iñigo Roquek eta Iskandar Rementeriak
John Bergerren Europako migratzaileen inguruko 'Zazpigarren gizona' saiakera berezia landuko dute Tabakaleran. Asteazkenean, hilak 22, izango da ekitaldia, 19:00etan.
John Berger idazle eta pentsalaria, Jean Mohr argazkilariaren begietatik. 
Tabakalerak bat egin du John Bergerren jaiotzaren mendeurrenarekin, Katakrak argitaletxeak ekarritako aukera baliatuz: Zazpigarren gizona euskaraz irakurtzea. Bergerrek eta Jean Mohr argazkilariak elkarlanean sortutako lan honek Europako langile migratzaileen bizipenak jasotzen ditu, hitza eta irudia uztartuz. Urteurrenak testuinguru egokia eskaintzen du egilearen pentsamendu kritikoa berriz mahai gainean jartzeko, bere begirada gaur egun ere bizi mantentzen dela erakutsiz.
1975ean idatzia izan arren, liburuak badu gaurkotasunaren zantzu kezkagarri bat. Badirudi gaur egun komunikabideetan etengabe agertzen diren irudiak —Mediterraneoa zeharkatzen dutenak, AEBetako hegoaldeko mugan pilatzen direnak edo Rafah inguruan harrapatuta daudenak— aurreikusten dituela. Hala ere, lanaren indarra ez datza soilik edukian, baizik eta formaren ausardian: garaiko arte esperimentalaren eragina nabarmena da, narrazioaren zatiketan, testuaren eta irudien arteko talkan eta ikuspegi aldaketa bortitzetan. XX. mendeko abangoardien teknikak baliatuz, Bergerrek migrazioaren esperientzia bera bezain zatitua eta kontraesankorra den egitura sortzen du.
Liburuaren atzean dagoen historia ere ez da nolanahikoa. Bergerrek G. eleberriagatik jasotako Booker saria gogor kritikatu zuen, haren oinarrian zegoen ustiapen koloniala salatuz. Hala ere, dirua onartu eta modu kontzientean birbideratu zuen: erdia Pantera Beltzen mugimenduari eman zion, eta beste erdia Europako langile migratzaileen inguruko ikerketa honi ekiteko erabili zuen. Keinu horrek argi erakusten du Berger ez zela soilik pentsalari zorrotza, baizik eta bere ideiak praktikara eramateko prest zegoen intelektual konprometitua.
Tabakalerako ekitaldiak hiru ahots bilduko ditu obra berezi hau berriz biziarazteko. Iñigo Roque itzultzaileak testuaren atzean dagoen lana azalduko du; Jone Laspiur aktoreak pasarteak taularatuko ditu, hitzei gorputza emanez; eta Iskandar Rementeria ikerlariak iruditeria horren dimentsio politikoa aztertzeko gonbita egingo du. Guztien artean, Bergerrek utzitako ondarea berrirakurtzeko aukera zabalduko dute, garai berrietara egokituta baina bere muin kritikoa galdu gabe.
