Duncan Dhu, Zahara Rave eta Kiko Veneno egongo dira, besteak beste, Miramar Gauak musika jaialdian
Miramar jauregia.Artxiboko irudia 
Miramar Gauak jaialdiak hirugarren urtez zabalduko ditu ateak. Gaur goizean aurkeztu dute programazioa, eta azaldu dute oreka bilatu duela musikari beteranoen eta egungo proposamen berritzaileen artean.
Jaialdia maiatzaren 28an, osteguna, hasiko da Zahara Raveren eskutik. Artistak bere alderdirik elektronikoena erakutsiko du, Silvana Estrada mexikarraren ahots sakonarekin eta Carlos Ares zein Isora gazteen talentuarekin batera.
Maiatzaren 29an, ostirala, nostalgia eta pop garaikidea uztartuko dituzte. Mikel Erentxunek Duncan Dhuren 40 urteko ibilbidea ospatuko du, eta gau horretan bertan, Veintiuno, Neomak eta Supercremalleras taldeek indarra eta freskotasuna emango diote oholtzari.
Azken egunean, maiatzaren 30ean, Bebek eta Kiko Venenok itxiko dute zikloa. Horiekin batera, Idoia, Luis Fercan eta Smile taldeek ilunabarreko giro intimoaz gozatzeko aukera emango diote publikoari.
Tokikokoari lekua
Musika eskaintza borobiltzeko, edizio honek Gure Plaza gunea berreskuratuko du. Espazio horretan, Donostiako tokiko merkataritzak eta emakume sortzaileek beren produktuak erakutsi ahal izango dituzte, jaialdiaren jasangarritasunaren eta gertutasunaren aldeko apustua indartuz.
Sarrerak salgai daude jada jaialdiaren webgune ofizialean eta ohiko salmenta puntuetan.
