Hurrengo hamar urteetan Donostian euskara sustatzeko plana aurkeztu du udalak
2036ra bitarteko euskararen inguruko Donostiako plana aurkeztu dute, euskalgintzako ordezkari ugarirekin batera. Donostia euskaldunago bat eraikitzea du xede egitasmoak.
Tabakaleran aurkeztu du Donostiako Udalak Donostian Euskara Sustatzeko Plan Estrategikoa (2026-2036), euskalgintzako ordezkari ugarirekin.Donostiako Udala 
Aurreko Euskara Planaren indarraldia amaituta, prozesu luze baten ostean, Donostian Euskara Sustatzeko Plan Estrategikoa (2026-2036) aurkeztu du asteazken goizean Donostiako Udalak, Tabakalerako Prisma espazioan: D-Aroa. 150 pertsona inguru egon dira ekitaldi instituzionalean: hiriko euskalgintzako eragileak, udal ordezkariak, ikastetxeetako eta administrazioetako kideak, merkatariak, kirol eta kultur arloko ordezkariak eta herritarrak, besteak beste. IRUTXULOKO HITZA ere bertan izan da, planaren parte hartze prozesuan parte hartu baitzuen.
Donostia Euskalduntzeko Urratsak izenburua jarri diote ekitaldiari, hori baita planaren helburu nagusia, 2026tik 2036ra bitarte lantzekoa. “Gaur, Donostiak datozen urteetan euskararekin egin nahi duen bidea partekatzen dugu”, nabarmendu du Jon Insausti alkateak. Era berean, azaldu du plana “hamarkadetan zehar egindako lanaren jarraipena” dela: “Erakundeek, euskalgintzak, ikastetxeek, familiek, sortzaileek, merkatariek eta ostalariek, kirol eragileek eta herritar askok egindako urratsen emaitza”.
Sara Cozar aktore eta aurkezleak gidatu du ekitaldia, eta Insaustiren hitzartzeaz gain, planaren xedea islatzeko pieza artistiko bat ere eskaini dute, dantza eta antzerkia uztartuz. Antzezlana Aitziber Garmendiak eta Lucia Ocarizek zuzendu dute; oholtza gainean Lorea Intxausti eta Oihana Maritorena aritu dira antzezle lanetan, eta Sua Enparantza zein Izaro Urrestarazu dantzariek osatu dute proposamen eszenikoa.
Erabilera, erronka nagusia
Alkateak ekitaldian azaldu duenez, “ezagutza erabilera bihurtzea” da planaren erronka nagusia, beste hainbat erronkaren artean: “Gure erronka ez da soilik euskara jakitea. Gure erronka da euskaraz eroso bizitzea, erabiltzea, partekatzea eta gozatzen ikastea. Euskarak Donostia garaikide, ireki eta anitz baten erdigunean egon behar du. Euskara kohesiorako tresna izan daiteke, bizikidetzarako zubi eta hiri nortasun partekatu baterako oinarri”.
Horrela, honakoak dira erronka zehatzak, Insaustik nabarmendu duenez: ulermena orokortzea eta euskaraz eroso arituko diren hiztunen kopurua handitzea; familia bidezko transmisioa indartzea eta euskararen arnasguneak sustatzea; etorri berriak euskarara hurbiltzeko bide inklusiboak garatzea eta 0 eta 16 urte bitarteko haur eta gazteentzako euskarazko aisialdi eskaintza orokortzea zabaltzea.
Horretarako, udalaren konpromisoa beharko dela adierazi du Insaustik, baina baita bestelako eragileena ere: “Erronka hau ez da udalak bakarrik erantzun dezakeen zerbait. Euskalgintza, ikastetxeak, kultur eragileak, kirol klubak, ostalariak eta merkatariak, enpresak, auzoetako eragileak, gainerako administrazioak eta herritarrak behar ditugu”. “Gaur plan bat aurkezten dugu, bai. Baina, batez ere, norabide bat partekatzen dugu. Ez dugu egun batetik bestera egingo, baina urratsez urrats egingo dugu”, gaineratu du alkateak.
