Donostiako hondartza denboraldi berria ekainaren 1ean hasiko da, kerik eta bozgorailurik gabe
Hondartzen denboraldia aurkeztu dute, Zurriolan.Donostiako Udala 
Astelehenean (ekainaren 1) hasiko da aurtengo hondartza denboraldia, Donostian. Irailaren 30era arte luzatuko da, eta berrikuntza garrantzitsuak dakartza bizikidetzan, jasangarritasunean eta erabiltzaileen atsedenean. Zerbitzu gehienak astelehenean bertan abiatuko badira ere, olanak, karpak, itzalkinak eta aulkiak ekainaren 15etik aurrera egongo dira martxan.
Kerik eta zaratarik gabeko guneak
Aurten, hondartzei buruzko ordenantza berria jarriko da indarrean; horrek erabat debekatzen du hareatzetan erretzea eta entzungailurik gabeko soinu aparatuak erabiltzea. Erabaki honekin herritarren kexei eta zigarrokinek eragindako kutsadurari erantzun nahi zaiela adierazi du udalak.
Hala, arauak betetzen ez dituztenei 100 eta 750 euro arteko isunak ezarri ahal izango zaizkie: unean uneko jokabidea, eragozpen nabarmenik gabea, berehalako onespen edo esanekotasuna, 100–200 €; eragozpen nabarmenak, aurretiko abisuak edo jokabide egoskorra, 200–500 €. Eta berriro egitea, desobedientzia, bolumen altua edo jende askori eragitea, 500–750 €.
Garbiketa eta mantenua indartzea
Udalak dispositibo berezi bat jarriko du martxan, egunero, hiru hondartzetan eta Santa Klara uhartean. Lana antolatzeko modu hauek ezarri dira:
Gauez eta 10:00ak arte, hondarraren baheketa mekanikoa egingo dute. 10:00etatik aurrera, eskuzko garbiketa, paperontziak hustea eta sarbideak nahiz Kontxako hegala garbitu. Eta bai goizez baita arratsaldez ere, badian dauden hondakin flotagarriak jasoko dituzte.
Salbamendua eta sorospena
Salbamendu eta sorospen zerbitzua, hala, ekainaren 1ean hasiko da hiru hondartzetan. Santa Klara uhartean, berriz, ekainaren 15ean hasiko da, eta aurten lehen aldiz irailaren 30era arte luzatuko da.
Guztira koordinatzaile bat, hemezortzi sorosle eta hiru patroi egongo dira, quad berri baten laguntzarekin: goi denboraldian (ekainaren 1etik 14ra eta irailaren 16tik 30era), 10:30etik 19:30era. Beheko denboraldian (ekainaren 15etik irailaren 15era), ordea, 10:00etatik 20:00etara.
Horrez gain, sei gabarroi banatuko dira Kontxa eta Ondarreta artean, eta bainu segurua bermatzeko eremu balizatuak jarriko dira bi hondartza hauetan eta uhartean.
Bainu lagundua
Bestalde, Kontxako bainu lagundua goi denboraldian eskainiko da, 11:00etatik 19:30era, hiru monitore espezializaturekin eta material egokituarekin, eta bainu lagunduko txartelak kabina kolektiboetara sartzeko ere balioko du. Aldagelak 09:00etatik 20:00etara irekiko dira ekainean eta irailean, eta 20:30era arte uztailean eta abuztuan.
