Gladys Eneako pauma batzuk hiriko beste naturagune batzuetara eramatea aztertzen ari da udala
Aztertzen ari diren aukeren artean hauek daude: Aieteko parkea, Uliako espazio batzuk eta Ametzagaina parkea.
Gladys Eneako pauma bat.Donostiako Udala 
Gladys Enea parkeko pauma populazioak gora egin du azken urteotan, eta, hain zuzen ere, zenbait pauma gazte ikusi dira azken asteotan hiriko hainbat lekutan, bereziki Tabakaleraren inguruan, etorkizuneko Atotxako geltokiaren inguruetan eta parketik hurbil dauden beste espazio batzuetan. Donostiako Udaleko Ingurumen Sailak azaldu du “ale gazte batzuen portaera naturalari” erantzuten diola horrek, “izan ere, garapen fase horretan esploratzeko joera handiagoa izaten dute, eta aldi baterako parketik kanpo zabaltzen dute beren ohiko mugimendu eremua”. Horregatik, “lasaitasunerako deia” egin dute udaletik.
Hala ere, udalak iragarri du “animalien ongizatea bermatzeko eta parkearen barruan oreka egokia mantentzeko irtenbide bat” bilatzen ari direla, eta, hain zuzen ere, aztertzen ari diren aukeren artean dagoela pauma batzuk “hiriko beste naturagune batzuetara lekualdatzea”. Aztertzen ari diren aukeren artean hauek daude: Aieteko parkea, Uliako espazio batzuk eta Ametzagaina parkea.
“Denbora daramagu irtenbide arduratsu eta planifikatu batean lanean. Ez da animaliak leku batetik bestera eramatea soilik; haien ongizatea eta egokitzapena baldintza egokietan bermatuko dituzten espazioak aurkitzea da helburua. Hartzen den edozein erabaki irizpide teknikoetan, ingurumen irizpideetan eta animalien ongizatean oinarrituta egongo da”, azaldu du Iñigo Garcia Villanueva Ingurumen zinegotziak.
