Euskal selekzioaren ofizialtasuna aldarrikatu dute
Euskal selekzioaren ofizialtasuna aldarrikatu dute.Joseba Parron San Sebastian 
Espainiak gizonezkoen futboleko Munduko Kopako finala jokatu eta irabazi zuen atzo; hala, hitzorduaren harira, Donostiako Udalak partida kalean jarraitzeko pantaila erraldoiak jartzeko erabakia hartu zuen, eta horrek erantzun irmoa eragin zuen hirian. Arratsaldean, “Euskal Herriarentzako autodeterminazioa” eta “kirolean lehiatzeko ofizialtasuna” aldarrikatzeko manifestazioa egin zuten hiriko kaleetan zehar, Bultzada taldeak deituta, ehunka herritarren gazte, heldu eta zaharren parte hartzearekin.
19:00etan Bulebarretik abiatu ziren mobilizazioan, antolatzaileek gogor salatu zuten pantaila erraldoien ezarpena. Bultzadaren hitzetan, udalaren erabaki horrek inposizio eta zapalkuntzaren normalizazioa erraztu zuen: “Futbolaren aitzakiapean, espainiar nazionalismoa indartzen da, nazionalismo erabat baztertzailea eta inposatzailea”.
Partida hasi aurretik eta bitartean, Donostiako Udalak jarritako pantailen inguruan zaleak bildu ziren, eta espainiar ikurrak nagusitu ziren gune horietan. Bultzadak erakunde publikoen jarrera kritikatu zuen, baliabide publikoak erabiliz hiriko kaleak “ikur eta aldarri espainolistez” betetzea ahalbidetu zutelako. Hala, adierazi zutenez, kaleetan ikusi zen Espainiako bandera ez da soilik identitate baten adierazlea, estatu egitura jakin baten ikurra baizik; “herrien autodeterminazioa ukatzen duen, euskara azpiratzen duen eta langileria esplotatzeko elite ekonomikoak babesten dituen” estatuarena, hain zuzen ere.
Gauzak horrela, bi irudi oso ezberdin utzi zituen atzoko egunak Donostian. Alde batetik, Munduko Kopako finala pantaila handien aurrean jarraitu zutenak, eta, bestetik, inposizioari aurre egiteko “kaleak hartzea” ezinbestekotzat jo zutenak.
Joseba Parron San Sebastian argazkilariak bigarren horiek erretratatu zituen:
