Aurtengo Euskal Jaiak aurkeztu ditu udalak
Euskal Jaien kartela aurkeztu dute.Donostiako Udala 
Bihar, hilak 2, hasiko dira Euskal Jaiak, Kontxako Bandera, Sagardo Eguna, kontzertuak eta lehiaketak egongo dira, besteak beste. Gaur aurkeztu duten kartelaren ezaugarri nagusiak “bizitasuna eta kolorea” dira, eta erdian dantzari bikote bat dago, euskal jantziekin.
Asteburu honetarako hainbat jarduera antoladu ditu udalak. Larunbatean, hilak 5, Sagardo Eguna egingo da, Plaza Berrian 11:00etatik aurrera; Kantujira herrikoia Loiola kaletik Parte Zaharrera, 12:00etan; eta Esku Dantza eta jarraian erromeria Plaza Berrian, 19:00etatik aurrera, besteak beste. Igandean, hilak 6, Gaztelu Eguna ospatuko da, 1813ko sarraskiaren ostean Donostia nola berreraiki zen oroitzen duen jarduera.
Astean zehar ere jarduera eskaintza dago: Poesia orduak errezitala hilak 7an eta 8an; Euskal Jantziak erakusketa ikusgai egongo da San Jeronjimo aretoan irailaren 5etik 12ra artean; hilak 11ean, ostirala, erromeria izango da Trinitate plazan Zatekeen taldearen eskutik, etab.
Bigarren asteburuko larunbatean, hilak 12, muxikoak eta XVIII. Larrain dantza dantzatzeko aukera egongo da Plaza Berrian, 12:00etatik aurrera. Trinitate plazan, Donostia Bertsolari jaialdia ospatuko da 20:00etan.
Haurrentzako espresuki prestatutako egitaraua ere egongo da: haurrentzako zine emanaldia Kresala elkartean, hilak 9an; XI. Toka Haur Txapelketa Trinitate plazan, hilak 11an; Dragoiaren jaitsiera Urgulletik, hilaren 12an… Beste hainbesteren artean.
Kirolak
Hamabi egun iraungo duten jaien hasiera Kontxako Banderarako gizonezkoen sailkatze proba izango da. Ostegunean, hilak 3, emakumezkoen sailkatze proba egingo da. Ondoren, lehen jardunaldia Euskal Jaien lehenengo igandean, hilak 6, egingo dute, 11:00etan emakumezkoena eta 12:00etan gizonezkoena, urtero legez. Bigarrena, hurrengo igandean, hilak 13, egingo dute, ordutegi berdinarekin.
Bestetik, Kontxako Banderaz gain, Esku Pilota Txapelketako finalak hilaren 10ean jokatuko dira Trinitate plazan eta hilaren 12an bi kirol topaketa egongo dira ere: Urgulleko XXIV. Krosa eta 82. Kontxa Badiako Igerialdia.
Donostiako Udalaren webgunean ikusi daiteke egitarau osoa, hemen.
