Ereski lursailean 40 zuhaitz baino gehiago baimenik gabe moztu dituztela salatu dute
Joan den astean aurrera eramandako zuhaitz mozketako irudi bat.Lugaritzeko Auzokideak 
Lugaritzeko Auzo Elkarteak ohar baten bidez salatu du Ereski lursailaren jabe den Inmobiliaria Renteria enpresak (Antiguo Berri Taldea) etxearen inguruko parkean zeuden 40 zuhaitz baino gehiago moztu zituela joan den astean, horretarako baimenik izan gabe.
Gogoratu dutenez, enpresak eta udalak hitzarmen bat sinatu zuten partzelaren erabilgarritasuna %150 handitzeko, baina bizilagun elkarteak epaitegietara jo zuen eta EAEko Auzitegi Nagusiak baliogabetu egin zuen plangintza, Lurzoruaren Legeak ezarritako estandarretako hiru gutxienez ez betetzeagatik: eraikigarritasunaren gehikuntzaren %40 —21 etxebizitzaren baliokidea— Babes Publikoko Etxebizitzetara bideratzea. 1.283 metro koadroko lursaila tokiko berdegune publiko izendatzea —plangintzak erabilera pribatura bideratzen zuen basotxoa, igerileku gisa—; eta 1.221 metro koadroko lursaila beste tokiko zuzkidura publiko batzuetara bideratzea.
Elkarteak salatu duenez, indargabetutako plangintza ordeztuko duenik onartu gabe, jabeek berdegune publiko izatera bideratuta basoaren zati bat moztu dute, “lizentziarik gabe eta kanpo kontrolerako inolako aukerarik gabe”. Hirigintza Sailak baieztatu egin du baimenik ez dutela eta ostiralean, hilak 4, hura eteteko eta dagokion zehapen espedientea abiarazteko agindu zuen.
