'Celebrating una forma de ser' lelopean, 50. urteurrena ospatzen ari da St. Patrick's English School
St Patricks English Schooleko sortzaileak. St Patrick's English School 
St. Patrick’s English Schoolek 50. urteurrena ospatzeko egitaraua abiatu du asteburu honetan, ikastetxearen sorreran parte hartu zuten familiei eskainitako ekitaldi batekin. Ehun pertsona baino gehiago bildu ziren Donostiako ikastetxearen instalazioetan, eta lehen belaunaldietako ikasle, irakasle eta langileek zein familia fundatzaileek parte hartu zuten jardunaldian. Besteak beste, ekitaldi instituzionala eta instalazioetarako bisita egin zituzten. Celebrating una forma de ser da hautatu duten leloa.
Ikastetxearen historia 1976an hasi zen, Donostiako guraso talde batek ingelesezko irakaskuntza zuen ikastetxe laiko eta misto bat sortzea erabaki zuenean. Hasierako ikasturtea 305 ikaslerekin abiatu zen, Ategorrietako Villa Maria Teresan. Ondoren, Jesusen Bihotzaren instalazioetan ere jardun zuen ikastetxeak, eta 1979an Aieteko magalean dagoen egungo egoitzara lekualdatu zen. Urte hartan, 210 familiak beren ondarearekin bermatu zuten instalazio berriak finantzatzeko mailegua, ikastetxeak emandako datuen arabera.
Bost hamarkadatan zehar, St. Patrick’s English School kooperatiba gisa aritu da, eta bere hezkuntza eskaintza egokitzen joan da. Gaur egun, 2 eta 18 urte bitarteko ikasleei zuzendutako irakaskuntza arautua eskaintzen du eta ingelesa du hezkuntza proiektuaren ardatzetako bat. Ikastetxeak, halaber, euskararen irakaskuntza indartu du eta gaztelaniazko prestakuntza eskaintzen du; frantsesa ere hautazko ikasgai gisa ematen du.
50. urteurrenaren harira, 2026-2027 ikasturtean hainbat jarduera antolatuko dituzte ikasle, familia, ikasle ohi, irakasle eta langileekin. Ospakizunen amaierako ekitaldia 2027ko ekainaren 19an egingo dute Kursaalen. Ikastetxeak jakinarazi du urteurreneko jardueren eta izen-emateen inguruko informazioa horretarako prestatutako webgunean argitaratuko duela.
