Donostiako Arte Eszenikoen Tailerrak 30 urte bete ditu
AETeko ikasleak.AET 
1995ean sortu zenetik, Donostiako Arte Eszenikoen Tailerrak (AET) ehunka pertsonari zabaldu dizkie antzerkiaren munduko ateak; aurten, hala, bere 30. urteurrena ospatzen ari da. Hastapenetan hainbat tokitatik igaro bazen ere, gaur egun Egian eta Gazteszena aretoaren inguruan dago kokatuta proiektua.
Funtzio profesionalez gain, AETk gorputzaren bidez adierazten, besteen larruan jartzen, entzuten eta “serioak izanik” jolasten erakusten du; ikasketa prozesu hori ez da teorian geratzen. Ikasleek urtero bi antzerki erakusketatan hartzen dute parte (euskaraz eta gaztelaniaz), sorkuntzatik hasi eta azken antzezpeneraino. Donostia Kulturaren programazioaren barruan egiten den apustu honi esker, ikasleek benetako esperientzia eszenikoa bizi dute, publikoari aurre eginez.
2026-2027ko ikasturterako izen ematea irekita dago 16 urtetik gorako edonorentzat. Aldez aurreko antzerki esperientzia izan ala ez, interpretazioa ikasteko, taldean lan egiteko eta lehen pertsonaia baten larruan sartzeko prest dagoen belaunaldi berri baten zain dago Donostiako Arte Eszenikoen Tailerra.
