Euskadiko Parke Teknologikoaren festa, ostegunean: Parkea Musik Fest
Parkea Musik Festen artxiboko irudi bat.Parkea Musik fest 
Parkea Musik Fest jaialdiaren edizio berria urriaren 1ean egingo dute Donostia Campusean, 17:00etatik aurrera, egoitza eraikinaren kanpoaldean. Sarrera doakoa eta irekia izango da, eta TECNALIAko eta Multiverse Computingeko langileekin lotutako hiru musika proposamen izango dira protagonista: Los Veletas, Eusten eta Telmo Esnaola DJa. Jaialdiak Parkeko enpresetan eta zentroetan lan egiten duten pertsonen “alderdi artistikoa ezagutaraztea” du helburu, jarduera profesionaletik harago.
Multiverse Computingeko Telmo Esnaolak zortzi urte daramatza DJ lanetan, eta Informatika Ingeniaritzako ikasketekin uztartu du ibilbide hori. TECNALIAko ikertzaile Iñaki Ortego Isasak, berriz, Eusten bere proiektu musikal pertsonala aurkeztuko du zuzenean lehen aldiz. Neuroteknologiaren arloan dihardu TECNALIAn, eta duela bi hamarkada inguru sortutako abestiak berreskuratu ditu proiekturako. Gainera, zientziaren dibulgazioan ere parte hartzen du Euskadi Irratiko Faktoria saioan.
Egitaraua Los Veletas taldeak osatuko du; taldeak bi lan argitaratu ditu eta streaming plataformetan du bere musika eskuragarri. Taldeko kideen artean Elena Morales Areizaga dago, TECNALIAko saiakuntza mekanikoen laborategiko industria-ingeniaria, ahots eta koru arduraduna. Musika-emanaldi horiez gain, ekitaldian zozketak, sariak eta lehiaketak egingo dira, besteak beste, futbolin-txapelketa eta bizkotxo-lehiaketa; azken horretan, Parke Teknologikoko Bizi jatetxeko taldeak osatuko du epaimahaia.
Parkea Musik Fest duela zenbait urte sortu zen Donostia Campusean, “Parkerako erronka bat” izeneko berrikuntza irekiko ekimenaren barruan. Proiektu horren helburua Euskadiko Parke Teknologikoa eta bertan lan egiten duten pertsonen “bizi kalitatea hobetzeko” ideiak jasotzea zen. Ordutik, ekimenak espazio teknologiko eta enpresariala musikarako eta elkargunerako eszenatoki bihurtu du.
