Fiskalak hirugarren gradua geldiarazi dio berriro Jon Olarra Guridiri
Euskal presoen eskubideen aldeko mobilizazio bat, Donostian.Joseba Parron San Sebastian 
Espetxeko batzordeen erabakiaren aurka egin du fiskalak, helegite berri baten bidez. Hala, Jon Olarra Guridi euskal preso donostiarrari hirugarren gradua geldiarazi dio berriro.
Olarrak 25 urte baino gehiago darama kartzelan: bere sententziaren erdia baino gehiago (hirugarren gradura iristeko aukera zigorraren erdia betetzen denetik aurrera dago). Sarek argudiatu du donostiarrak zigorraren erdia 2017an bete zuela, baita baldintzapeko askatasuna ekarriko luketen zigorraren hiru laurdenak ere. 2022an gerturatu zuten presoa Euskal Herrira, Juankar Iglesiasekin batera.
Fiskaltzak, bere aldetik, argudiatu du zigorra osorik betetzeko “oraindik denbora asko” geratzen dela (2032an amaituko du zigorra Olarrak). Sarek adierazi du “kezkatuta” daudela, “justizia humanistarekin zerikusirik ez duten jarrerengatik”. Mugimenduak salatu duenez, presoak zigorra betetzen duen lekutik “kilometro askotara” hartzen dira jarrera horiek, eta “ez die jaramonik egiten espetxe barruan egunez egun lan egiten duten profesionalei”.
Sarek nabarmendu du “justiziarekin eta mendekuarekin zerikusirik ez duten” erabakiak direla, eta horrek ez duela zerikusirik “gure herrian sufrimendu aro bat behin betiko ixteko beharrarekin”. Amaitzeko, salatu du hori lortzea ezinezkoa izango dela “politikagintzan, epailetzan eta komunikabideetan kokatutako botere lobbyek dirauten bitartean”.
