Korrikalarien osasuna, lesioen prebentzioa eta emakumeen beharrak aztergai, Deustuko Unibertsitatean
Korrikalarien osasuna, lesioen prebentzioa eta emakumeen beharrak izango dituzte aztergai, Deustuko Unibertsitatean.Deusto Unibertsitatea 
Korrika egiteak dakartzan erronkak eta sarritan ezkutuan geratzen diren gaiak —hala nola lesioen prebentzioa, prestakuntza fisikoa eta emakume korrikalarien behar espezifikoak— ardatz hartuta, osasun eta kirol arloko profesionalak bilduko dira Deustuko Unibertsitatearen Donostiako campusean. Hitzordua urriaren 30ean izango da, 10:00etan.
Ekitaldia Euskadiko Fisioterapeuten Elkargo Ofizialak (EFEO), Euskadiko Podologia Elkargo Ofizialak, Deustuko Unibertsitateak eta Espainiako Kirol Podologiako Elkarteak (SEPOD) antolatu dute. Osasun arloko profesionalei zuzendutako jardunaldia da, doakoa, baina ezinbestekoa da aldez aurretik izena ematea.
Emakume korrikalariaren errealitatea
Jardunaldian pisu handia izango du emakumeen osasunak. Marina Guallar Bouloc fisioterapeuta eta doktoreak zoru pelbikoaren zaintzari buruzko hitzaldia eta tailer praktiko bat eskainiko ditu, kirol jarduna emakume bakoitzaren beharretara egokitzearen garrantzia nabarmenduz.
Gaiari helduz, Alejandra Ron Marqués traumatologoak korrikalari emakumearen ikuspegi klinikoa landuko du. Maider Lamarain Altuna fisioterapeuta eta erizainak, berriz, hilekoaren zikloak ariketan nola eragiten duen azalduko du, jarraibide unibertsalik ez dagoela gogoraraziz.
Minaren interpretazioa eta biomekanika
Belauneko, gerriko edo aldakako min arinek askotan zalantza sortzen diete korrikalariei: gelditu ala jarraitu? Mónica Espeleta Alfaro fisioterapeutak galdera horri erantzungo dio; haren esanetan, oinazeak ez du ezinbestean gelditzera behartzen, baina ezin zaio ezikusiarena egin; kasu bakoitzaren bilakaera eta karga erantzuna aztertu behar dira erabaki bat hartu aurretik.
Hobeto ulertzeko gorputzak nola jokatzen duen, korrika egitearen biomekanika zehatz mehatz aztertuko dute programa barruan: propultsioa, indargetzea, eliteko atleten eta korrikalari amateurren arteko aldeak, eta bizkarrezurraren nahiz oinetako patologia batzuen zeregina.
Prebentzio tailerrak
Alderdi teorikoez gain, jardunaldiak prebentzioa lantzeko tailer praktikoak bilduko ditu: bendaje funtzionalak, korrikalarientzako bihotz-biriketako bizkortzea, beheko gorputz adarretarako ariketa terapeutikoak eta kostu txikiko teknologia bidezko biomekanika.
Arratsaldean zehar, oinetakoen egonkortasun sistemen garapena eta entrenamendu osasuntsurako mediku gomendioak jorratuko dituzte. Saioarekin amaitzeko, Sergio Román Bermejo atletak bere kirol ibilbideko esperientzia kontatuko du, eta bertaratutakoek adituekin iritziak partekatzeko eta galderak egiteko tartea izango dute.
