Udalean etxebizitzari buruzko dekretuei babesa emateko bozketan EAJk izandako «jarrera» salatu du EH Bilduk
Donostiako etxebizitza ugari.Joseba Parron San Sebastian 
Espainiako Gobernuak etxebizitzari buruzko errege dekretu batzuk onartzeko asmoa du, eta horiei babesa emateko erakunde adierazpena izan zuten eztabaidagai Donostiako Udaleko bozeramaileen presazko batzordean, EH Bilduk hedabideei helarazitako ohar batean azaldu duenez. Adierazpena ez zen aurrera atera, eta oposizioko alderdiak EAJren udal taldearen “jarrera kezkagarria” salatu du: “Jon Insausti alkatearen alderdia abstenitu egin da. PPk emandako kontrako botoekin batera, ekimenak ez du aurrera egin eta, beraz, erakunde adierazpena ez da onartu”.
“EH Bilduk alde bozkatu du, eta beste behin osoko bilkuraren gehiengo aurrerakoiak alde egin badu ere, beste behin, eskuinak bat egin du herritarren lehentasunei eta arazo nagusiari bizkarra emanez”, nabarmendu du EH Bilduk. Ildo beretik, “etxebizitza larrialdi bete-betean, herritarrak inoiz baino gehiago babestea dagokigu”, gaineratu du ezker abertzaleko koalizioak: “Hori da EH Bilduk bere gain hartua duen konpromisoa. Lehentasun horrekin ari gara lanean erakunde guztietan eta norabide horretan urratsak emateko baliagarriak diren ekimenak sustatzen ari gara, nekaezin”.
“Alkateak azalpenak eman beharko dizkie donostiarrei”, EH Bilduren ustez: “Orain da jendartea babesteko unea eta egoera zaurgarrienean daude herritarren eskura baliabideak jartzeko momentua. Beste behin, interes orokorraren mesedetan aritzeko aukera alboratu du, bakar batzuen alde egiteko”. “Dekretu hauen kontra egiteak negozioa eta espekulazioa babestea da; hauen alde egiteak, berriz, maizterrak eta etxejabe txikiak babestea”, gehitu du EH Bilduren udal taldeak.
