Gorputz batek norabide batean hartzen duen hedadura
Grisa, ingurua grisa bilakatu zaigu, ez fu ez fa, aspergarri bezain eramangaitza. Esan dezakegu ilusioa ez dela 2024 urtearen ezaugarri nagusia, zer gehiago pasatu behar den ezingo genuke asmatu, baina ez gintuzke gehiegi larrituko. Logalea, noraeza eta eszeptizismoa.
Garai honetan nor ausartzen da amestera? Etorkizunera begiratu eta noren begiek dute dirdira? Ameslari ameslarienak ere nekatuta daude. Ortzi muga? Non da hori? Utopia? Zer zen hori? Jan egiten da?
Heroiei aspaldi esan genien agur, eta ez daitezela itzuli, jakin badakigu epika birformulatu beharrean gaudela, baina nor hasiko da, nondik hasiko gara. Desesperantzaren aurrean, estrategia feminista besterik ez zaigu geratzen, ariketa kolektiboek irekitzen dizkiguten aukerei erreparatzea, gorputz kolektiboak ematen digun indarra baliatzea etorkizun desiragarriak marrazteko. Hau guztia, sarri, Euskal Herriko Bilgune Feministan topatu izan dut.
«Etorkizun desiragarriak merezi ditugu, amestu dezagun: trantsizio feminista dimentsio guztietan»
Orain dela bi urte, ustezko paradisuak erre nahi genituela esan genuen: paradisuak sutan ke-errautsak eskutan, eztandak dardara gaitzala! Zer egingo dugu, ordea, errautsekin? Ausartzen gara amestera?
Nik ere ez dut argi 2025rako nolako Donostia eta nolako Euskal Herria nahi ditudan, nola azalduko nukeen, zein aldaketa zehatz behar ditugun, edo hobe esanda hau nola egin. 2035, 2079 edo 2106 urteak urruti geratzen zaizkit, baina imajinatu ariketa kolektibo hau batera egiten dugula, dimentsio guztiei erreparatzen diegula: denbora, dirua, lana, zaintza, etxebizitza, harremanak, sinesmenak, gobernantzak, mugimenduak, sorkuntza, heziketa, osasuna, informazioa, araudiak, segurtasuna…
Imaginatuko dugu elkarrekin, irudikatuko eta irekiko ditugu ortzi muga berriak. Etorkizun desiragarriak merezi ditugu, amestu dezagun: trantsizio feminista dimentsio guztietan. Burujabetzarako estrategia berrituak eta bide partekatuak eskaini diezazkiogun elkarri, antolatu gaitezen datorren ofentsibari aurre egiteko. Azaroaren 16an Laudion ikusiko dugu elkar, Emakume* Abertzaleon X. Topaketa Feministan.
