Hainbat artistek euren proiektuak garatuko dituzte hiriko zazpi museoetan

Labore programan parte hartzeko epea ireki dute gaur, eta azaroaren 16a arte egongo da izena emateko aukera.

Lide Ferreira

2015/09/28

Donostia 2016 Gunean egin dute aurkezpena. (Argazkia: Lide Ferreira)

Donostia 2016k Donostia Kultura eta Donostiako Museoen Sarearekin lankidetzan antolatu duen Labore izeneko programa berria aurkeztu du gaur goizean, 2016 Gunean. Asmoa zazpi proiektu artistiko aukeratzea da, artistek sareko museoetako batean garatu ditzaten. Honela, zazpi artista ezezagun inguru Donostiako museoetan arituko dira lanean, lau eta zortzi asteetan zehar. Aurkeztetuko proiektuek site specific izaera izan beharko dute, eta museoaren bildumarekin, eraikinarekin, publikoarekin edo haren testuinguruarekin harreman bat proposatu beharko dute. Izena emateko epea azaroaren 16an itxiko da, 14:00etan. Laboreren bidez, beraz, tokiko eta nazioarteko artistek ondorengo museoetan garatuko dituzte euren proiektuak: San Telmo Museoa, Aquarium, Elizbarrutiko Museoa, Eureka! Zientzia Museoa, Museum Cemento Rezola, Real 100 Museoa eta Ontzi Museoa. Horietako bakoitzak bere berezko ezaugarriak ditu, eta horiek kontuan izango dituzte artistak aukeratzerako orduan. “Gordailu bezala definitzen ditugun museoak sorgailu bilakatuko dira”, nabarmendu du Donostia 2016ko Kultura programaren zuzendari Xabier Payak. Aukeratutako artistek 2.000 euro jasoko dituzte sorkuntzarako, 1.000 produkziorako eta ostatua, dietak, pieza osatzeko baliabideak eta laguntza artistikoa ere barne izango dituzte. Egonaldiak 2016ko urtarrilaren 25etik martxoaren 18ra egingo dira. Izena ematerako orduan, artistek hiru aukera izango dituzte:

Tokiko artisten eta nazioarteko artisten arteko lankidetza proiektua aurkeztea. Artista batek Euskal Herrikoa izan behar du, eta bestea nazioartekoa. Modalitate horretan Museum Cemento Rezola, Aquariuma eta Eureka! Zientzia Museoa aukeratu ahal izango dituzte partaideek.
Euskal Herriko artistak banakako proposamenekin. Donostiako Elizbarruti Museoa, Museum Cemento Rezola, Real 100 Museoa, Aquariuma, Eureka! Zientzia Museoa eta San Telmo Museoa dira atal honetan egongo direnak.
Bakarkako proposamenak aurkezten dituzten artistak, edozein jatorrikoak. Aquariuma, Eureka! Zientzia Museoa eta Museum Cemento Rezola dira aukeratu ahalko diren museoak.

Loturak sortzea

Prentsaurrekoan azaldu dutenez, sorkuntza artistikoa eta alor horretan berrikuntza sustatzea dira Donostia 2016k bere hasierako urratsetatik dituen bi helburu. Horretako, ezinbestekoak dira egonaldi artistikoak eta herritarren inplikazioa sorkuntza prozesuetan. Bide horretan urratsak ematen jarraitzeko, Donostia 2016 Fundazioak eta Donostia Kulturak lan metodologia bat diseinatu dute elkarlanean, hurrengo helmugetara gerturatzeko. Testuinguru hori da Laboreren sorrera dakarrena:

Lurraldeko ekipamenduetan artisten eta sortzaileen presentzia ohiko bihurtzea. Horretarako, sorkuntza prozesuen atal bat espazio horietan egitea bultzatuko dute.
Arte bitartekaritza jarduerak antolatzea, ekipamenduaren testuinguru soziala kontuan izanda. Horrekin lortu nahi dute sortzaile, ekipamendu eta herritarren artean loturak sortzea.