Otsailaren 3an jarraituko du Esteban Odriozola donostiarraren epaiketak

Loiolako Herri Harresian parte hartzeagatik auzipetu dute, Beñat Hach Embarek gaztearekin batera

Irutxuloko Hitza

2017/01/26

Auzipetuei babesa adierazteko elkarretaratzea egin dute goizean, Donostiako Lurralde Auzitegiaren aurrean. (Argazkia: @sortu)

Zortzi hilabeteko espetxe zigorra eskatu die fiskaltzak. Akusazio popularrak, berriz, autoritatearen aurkako atentatua eta desobedientzia leporatzen die. Bi urte eta erdi igaro dira Loiolako Herri Harresia egin zuenetik, eta gaur hasi dira epaitzen Esteban Odriozola eta Beñat Hach Embarek gazteak Donostiako Lurralde Auzitegian. Segiko kideak izatea egotzita 1/12 sumarioan auzipetuta zeuden Jazint Ramirezi, Irati Tobarri, Igarki Roblesi, Xabier Arinari eta Imanol Salinasi babesa erakusteko herri harresia eraiki zuten Loiolan. Poliziak bertan bildutakoak “bortizki” atera zituen, bost gazteez gain beste bi herritar atxilotuz.

“Herri harresia husten ari zirela ertzain bat lurrera erori eta ospitalera eraman behar izan zuten, eta momentu horretan Ertzaintzak gu biok atxilotzea erabaki zuen, autoritatearen aurkako atentatua leporatuta, ertzainekin kontaktu fisikorik ere izan ez genuen arren”, azaldu du atxilotuetako batek. Ertzain-etxean, baina, atentatu kargua kendu eta desobedientzia leporatu zieten bi atxilotuei, “halakorik gertatu ez zela ohartzean”.

Fiskalak zortzi hilabeteko espetxe zigorra eskatu du bi auzipetuentzat, desobedientzia eta erresistentzia leporatuta. Akusazio partikularrak, ordea, autoritatearen aurkako atentatua eta desobedientzia leporatzen dizkie, eta hiru urtera arteko espetxe zigorra zein 21.292 euroko kalte ordainak ordaintzea eskatzen ditu.