"Auzoko talde eta elkarteen bidez eraiki dugu aurrean ikusten duzuen guztia"

Zementonen jaitsierarekin eman diete hasiera ofiziala karmengo jaiei; Karmen egunera arte egitarau zabala izango dute Añorgan.

Lide Ferreira

Añorga

2017/07/08

Kuadrillen eguna izan da gaurkoa Añorgako jaietan. Goizetik ibili dira festa giroan bertan, eta bazkari herrikoiarekin indarberritu dira Añorgakoak. Arratsaldean, mus txapelketa azkarra eta emakumeen frontenis txapelketaren finalak jokatu dituzte, baita pilota goxoko txapelketaren finala ere. Horren ostean iritsi da Zementonen txanda. Jaitsi dute jaietako pertsonaia, txupinazoa bota eta banderak igo dituzte elektrotxarangak girotuta. Gainera, Txurrutene txosna berria estreinatu dute, eta jende ugari hurbildu da bertara. Urtero bezala, Zementonek bere pregoia irakurri du auzotar guztien aurrean: Mc Donald`s-aren ondoko biztanleok, arratsaldeon! Mercadonaren inguruko auzotarrok, ongi etorri Añorgako festetara! Porlan fabrika baten ondoko auzo izan gara luzaro. Errepide bazterreko biztanle. Isilik nahi gaituzte orain; auzo mutu, boulevard dotore baten aldameneko porlan zati geldi. Lotarako auzo nahi gaituzte, baina guk aspaldi ikasi genuen amets egiten. Eta auzolanean eman diogu forma inguratzen gaituenari. Eskuz esku eraiki ditugu aurtengo festak ere; eraikitzea dugulako bizibide. Egin dugun auzoak egin gaitu gu ere. Eta egiten jarraitu nahi dugu, eraikitzen jarraitu nahi dugu. Horregatik elkartu gara gaur hemen. Añorga elkarrekin bizi nahi dugulako; elkarrekin gozatu nahi dugulako, aske, parez pare, eraso eta zapalkuntzarik gabe. Amesten dugun Añorga egia bilakatuko dugu bi asteburuotan. Gu ez garelako multinazionalen aldameneko lur zati bat. Bizi egin nahi dugu. Orain frontoia berritu eta plaza bat irabazi dugu. Baina inork ez digu ezer oparitu. Auzoko talde eta elkarteen bidez eraiki dugu aurrean ikusten duzuen guztia, eta horretan jarraituko dugu. Eta falta direnak laster gurekin egon daitezen gure indarra eta sormena erabiliko ditugu. Egiten dugun hori, elkarrekin egingo dugulako! Gozatu Añorgako festak, eta egin amets! Gora Zementon! Gora Añorga! Gauean Erokomeri taldearen kontzertua egongo da, eta, atsedenaldian, lehenengo aldiz, kaxen jolasa egingo dute. Bihar ere jaia izango da nagusi, eta horrela, Karmen eguna bitarte. Egitaraua zabala dute, beraz, Añorgan.

Erlazionatutako edukia‘Txurrutene’ prest daukate