Igarotako bidearen kronologia bat

Azaroak 1, gozozale guztien eguna

Donostian, toki askotan bezala, egunotan azaltzen dira opil denden erakusleihoetan done hezurrak eta haize pinporropilak. Gaurko egunez, hildakoei lore eskaintzen bidez errespetua erakusten bazaie, bizirik daudenei  gozokien bidez bazkal ostea poztu dakieke. Egun batzuk daramatzate hiriko opil dendak bere erakusleihoetan  done hezurrak eta haize pinporropilak, edo buñueloak, erakusten. Sukaldean denbora pixka bat emateko gogoa duten irakurleentzat, egun honekin lotzen diren bi gozoki horien errezetak bildu ditu Irutxuloko Hitzak.  Jai egun bat besteen eguna gozatuz ematea probetxuzko ekinbidea izan daiteke, Azaroak 1a, Domu Santu eguna izateaz gain, gozozale guztien eguna  ere badelako.   Haize pinporropilak osatzeko jarraibide klasikoa

(Argazkia: Mikel Goñi)

  • 200 g. irin
  • 50 g. gurin
  • 5 arrautza
  • 1/2 litro esne
  • Edalontzi txiki bat ur
  • Limoi baten azala
  • Azukrea
  • Olioa eta gaza
Jarri lapiko batean esnea, ura, limoiaren azala eta gatz pixka bat. Irakitera iristear dagoela bota irin guztia batera; eta su suabe-suabean dena nahasi . Sua bizkortu eta  nahasketa lapikoaren hormetatik banatu arte jarraitu eragiten. Sutatik eltzea kendu, eta, epeltzen denean, aldez aurretik irabiaturiko arrautzak batu, gutxika eta nahasteari utzi gabe. Ore homogeneoa lortuta, zopa koilara erabiliaz ore puskak hartu eta frijitu. Horretarako olio asko eta oso beroa erabiltzea da onena. Horixka daudela, pinporropilak zartaginetatik atera eta sukalde-papera duen plater batera pasa. Azukre xehetua eta kanela dituen nahasketa gainean jarrita zerbitzatu.

(Argazkia: Mikel Goñi)

Done hezurrak behar bezala egiteko errezeta sinple eta erraza Mazapanarentzat
  • 200 g. irin
  • 100 g. ur
  • 150 g. almendra xehetua
Betegarriarentzat
  • 100 g. azukre
  • 50 g. ur
  • 4 arrautza gorringo
  Done hezurrak, finean, mazapan beteak dira. Beraz, batetik, mazapana prestatu behar da; eta bestetik, betegarria. Lehenengoa prestatzen hasteko azukrea eta urarekin, almibarra egin beharra dago, bertan fin-fin xehetutako almendra bota behar da eta asko- asko eragin. Sortutako pasta hozten utzi betegarria prestatzen den bitartean. Betegarrirako beste almibarra prestatu. Arrautzen gorringoa irabiatu eta gutxika almibarra gehitu. Berriz ere eltze batera pasa eta ur-bainuan egosi, nahasteari utzi gabe. Mazapana azukre hautsa duen mahai baten gainean zabaldu, eta lau bat zentimetroko aldeak dituzten laukiak moztu. Horiek bildu eta, betegarria erabiliz, done hezurrak bete.
HITZAkide HITZAkide