Bide Ertzean taldeak Kursaalen emango du 'Don Inorrez' diskoaren aurkezpen-birako azken kontzertua
Kursaaleko Ganbera Aretoan eskainiko du Bide Ertzean taldeak Don Inorrez diskoaren aurkezpen-birako azken kontzertua. Martxoaren 1ean izango da emanaldia, 20:00etan. Talde tolosarrarekin eszenatokian izango da Joserra Senperena pianista eta akordeoi-jotzaile loiolatarra, kolaboratzaile bezala hasi eta taldekide finko bezala bukatu baitu.
Bihotz bakarti, ausentzia eta igande arratsaldeei buruzko kantuez osatutako diskoa da Don Inorrez, eta Bide Ertzeanek une gozoan jarraitzen duela baieztatzen du, euskarazko kantu onenaren Espainiako Musika saria jaso baitu Don Inorrez kantuarekin.