Igarotako bidearen kronologia bat

Zarauzko Buffalo musika taldeak joko du bihar Aquariumen

Ezkerretik eskuinera: Patrick Trefz, Sancho Rodriguez, Steve Jones eta Juan Aizpitarte. (Argazkia: Nerea Lizarralde)

Manuel Garcia kantautore txiletarraren ordez joko du Surfilm Festibalak El mar, mi alma filmaren musikaren egilea, Manuel Garcia, ekarri behar zuen bihar Aquariumera. Kantautore txiletarrak, ordea, arazoak izan ditu bisarekin, eta ezin izan du Donostiara etorri. Haren ordez Zarauzko Buffalo taldeak joko du, ordu berean, 22:00etan. Filmaren proiekzioak aurrera egingo du, eta aurreikusi bezala 21:00etan emango dute El mar, mi alma. Steve Jones zuzendaria Donostiara etorri da filma aurkeztera. Txileko kostaldean zehar egindako bidaia da. Pablo Nerudaren poema musikatuak entzun daitezke filmean. Txileko arrantzale eta nekazariak, paisaiak, herritarrak eta surflariak agertzen dira Txileko iparraldetik hegoaldera eginako bidaian.

‘Itxasoa eta lehorra’ Patrick Trefz argazkilari eta errealizatzailea gaur iritsi da Donostiara Itxasoa eta lehorra erakusketa eta film laburra aurkezteko. Aquariumen zintzilikatu ditu bere argazkiak. Erakusketak Mikel Laboaren abestiaren izena hartu du. Trefz-ek beti izan du euskal kulturari lotutako proiektu bat egiteko gogoa, eta honako hau Mundakan egin zuen. Lan abstraktu eta poetiko honek Jim Denevan artista kaliforniarrak Mundakan egindako artelanaren sorkuntza eta desagerpenaren prozesua jasotzen du. Izan ere, Denevanek harearekin egiten du lan. Harean marrazten du, eta harearekin egindako figurak egiten ditu. Mundakan artelan erraldoi bati ekin zion 2011n. Ingurumenaren aldeko aldarrikapen hutsa da Denevanen lana, ikusleak bere arreta guztia Urdaibaiko itsasadarreko ekosistemaren ahultasunean jartzea lortzen du.

Zinema tailerra Juan Aizpitarterekin eta puntako surflariekin Juan Aizpitarte artista donostiarrak Ikuspegi hedatua mugimenduzko irudiari buruzko tailerra zuzenduko du. Zinemaren bidez surfari begiratzeko beste modu bat erakutsi nahi du. Iphone telefonoekin grabatuko dituzte irudiak, eta horiekin ekoizpen txukunak egin daitezkeela ikasiko dute tailerrean parte hartzen dutenek: “Ez duzu ekipamendu tekniko konplexurik behar narrazio bat egiteko. Edonork kontatu dezake istorio bat sakeleko telefonoarekin”, esan du Aizpitartek. Ostiralean Zurriola hondartzan ariko dira irudiak grabatzen. Tailer hauetan puntako surflarien laguntza izango dute. Kepa Acero, Igor Bellido, Patrick Trefz eta Jack McCoy.

HITZAkide HITZAkide