Martxoaren 17an emango diote "ongietorria" konpostari
Edukiontzi marroia erabiltzen duten Amara eta Groseko bizilagunak martxoaren 10ean hasiko dira txipdun edukiontziak erabiltzeko txartelak jasotzen.
Donostiako Udalak abian jarri duen Hemen da Konposta kanpainaren xehetasunak azaldu ditu gaur Nora Galparsoro Hiri Azpiegitura eta Zerbitzuetako zinegotziak gaur egin duen prentsaurrekoan. Txipdun edukiontziak Gros eta Amara auzoetan martxoaren 17an hasiko dira ezartzen eta dagoeneko izena eman duten bizilagunek datorren astelehenetik, martxoaren 10etik, aurrera hasiko dira txartel berriak etxean jasotzen.
Martxoaren 17an ere donostiar guztiek jokogarbia.donostia.org webgunean izena ematen hasi daitezke baina sistema berria erabiltzen hasteko euren auzoetan ezarri arte itxaron beharko dute. “Gros eta Amara auzoetako egokitzapen fasearekin batera, hiri osora zabalduko da Hemen da konposta kanpaina”, esan du Galparsorok. Honela, apirilaren hasieran ekingo zaio ezarpenaren lehen faseari, hau da, udalak auzo guztietan informazio guneak jarriko ditu, herritarrek sistema berria ezagutzeko, zalantzak argitzeko edota bertan izena eman ahal izateko. Nora Galparsoro bera ere bertan izango da.
Gros eta Amaran 92 edukiontzi egokituko dira eta, guztira, 450 edukiontzi jarriko dituzte. Horien ezarpena lau fasetan egingo da:
Nora Galparsoro Hiri Azpiegitura eta Zerbitzuetako zinegotzia gaur goizeko prentsaurrekoan. (Argazkia: Lide Ferreira)
- Morlans, Anoeta, Sagues eta Erdialdea: 95 edukiontzi.
- Ategorrieta-Ulia, Mirakruz-Bidebieta, Aiete eta Antigua: 93 edukiontzi.
- Añorga, Miramon-Zorroaga, Altza eta Intxaurrondo: 94 edukiontzi.
- Loiola, Loiolako Erribera, Martutene eta Zubieta: 50 edukiontzi.
