Larunbatean ospatuko dute Izarrak Plazara talentu lehiaketaren finala

Irutxuloko Hitza

2014/06/02

Sailkapen saioan hamalau taldek parte hartu dute; baina, finalean horietako sei besterik ez dira egongo.

(Argazkia: Plazara Goaz)

Gazteentzako lehiaketa hau Plazara Goaz Intxaurrondoko Euskaldunon elkarteak antolatzen du, eta gazteen artean sormen artistikoa sustatzea eta ondo pasatzea du helburu nagusia. Hemezortzi urte bitarteko gazteentzako lehiaketa da, eta edonork hartu dezake parte; norbere trebetasunak erakusteko gogoa besterik ez da behar. Musika, kantua, dantza, antzerkia, txisteak, bakarrizketak, bertsoak, magia, zirko ikuskizunak, edozerk balio du. Horixe bera erakutsi zuten sailkapen saioan parte hartu zuten hamalau taldeek. Guztira, 36 gazte elkartu ziren Intxaurrondo Kultur Etxean, eta gehienez, bost minutuko ikuskizunak eskaini zituzten. Saio bakoitzaren atzetik, epaimahaikideen galderak eta hobetzeko proposamenak etorri ziren, eta gomendiorik errepikatuenak gorputza askatzea, espazioa erabiltzea, eta gozatzea izan ziren, besteak beste. Talde guztiek euren ikuskizuna eskaini ondoren, epaimahaikideak elkartu eta tarte batez eztabaidan aritu ziren, sailkatutakoen izenak antolatzaileen eman zizkieten arte. Hona hemen finalera pasa diren sei taldeak:

Malaika taldea. Noizbaiteko doinua kanta, gitarraz eta pianoz lagunduta eskaini zuten.
Peru abeslaria. Zarama taldearen Iñaki kanta defendatu zuen.
Maier dantzaria. Tradizionala, klasikoa eta garaikidea uztartzen dituen ikuskizuna aurkeztu zuen.
Izarrak taldea. Fitoren Atseden une bat kanta oinarri hartuta, dantza ikuskizuna eskaini zuten.
Nora eta Maria. Musikaren dantza ikuskizuna aurkeztu zuten. Mariak dantza egin zuen, Norak pianoz lagunduta.
Irati dantzaria. Lady Gagaren Just dance eskaini zuen.

Sei talde hauek larunbatean, ekainak 7, izango dira berriro Intxaurrondo kultur etxean, 17:00etan. Bertan, finala ospatuko dute, eta proposatutako hobekuntzak kontuan hartuta, gazteek ikuskizun bera edo prestatzen duten berri bat aurkeztuko dute. Horretaz gain, ikuslearen saria ere banatuko dute, eta bertaratzen direnek zozkatuko duten opariren bat etxera eramateko aukera izango dute. Sarrera doan izango da, antzezlekua bete arte. Ikuskizuna hasi baino ordu erdi lehenago gonbidapenak banatzeari ekingo diote. Donostiako Udaleko Euskara Zerbitzuak eta Donostia Kulturak lagundu diote Plazara Goaz taldeari antolakuntza lanetan, eta, IRUTXULOKO HITZAk babestutako jarduera da. Iraileko tailerra eta ikuskizuna Hiru epaimahaikideek lehiaketan parte hartu duten guztien artean hainbat artista aukeratuko dituzte, finalerako sailkatuak zein sailkatu gabeak, eta bost egunez haiekin lan egingo dute, elkarrekin ikuskizun bat sortzeko. Tailerra irailaren 15ean hasi eta 19an bukatuko da, eta arratsaldez izango da. Ondoren, irailaren 20an, lan horren emaitza ikusteko aukera egongo da, Intxaurrondo Kultur Etxean.