Mikel Zabalza Herri Ekimenak mozio bat aurkeztu du, udalaren konpromisoa eskatuz

Agurtzane Altuna

2015/11/05

Mikel Zabalzari egindako lore eskaintza, Altzan. (Argazkia: Agurtzane Altuna)

Mikel Zabalza altzatarra atxilotu eta hilik agertu zela 30 urte beteko dira sarri, eta Mikel Zabalza Herri Ekimenak gune pribatutik publikora atera du kasua argitzeko aldarrikapena. Hala, alderdi politikoekin eta udal sindikatuekin hainbat bilera egin dituzte, Zabalza udal langilea zenez, udalak zeresana baduela uste baitute. Elkarrizketa horietan jasotako emaitzaren ondoren, mozio bat aurkeztu dute, azaroaren 26ko udalbatzarrean eztabaida dezaten.

Udalak 1985eko abenduaren 6an onartutako mozioa berretsiz, Zabalzaren heriotza eragin zuten gertaerak argitzen laguntzeko eskatu dute mozioan.

Gainera, batzorde bat sortzea nahi dute, bide horretan “egia eta justizia ezartzen, bere memoria sustatzen, biktima gisa onartua izan dadin eragiten, eta Mikel Zabalzari eta bere senideei erreparazioa eskaintzen parte aktibo izateko, beste erakundeekin, DBuseko langileekin eta herri ekimenekin batera”.

Azkenik, udalak DBuseko langileek eta Mikel Zabalza Herri Ekimenak antolatutako oroimen eta elkartasun jardueretan parte hartzeko dei egitea eskatu dute.

Urriaren 24an egindako prentsaurrekoan iragarri zuten 30. urtemuga izanik, hainbat jarduera antolatuko zituztela. Hala, azaroaren 11an Mikel Zabalza auzia eta Euskal Herrian torturak izan duen eragina aztertuko dituen Galdutako Objektuak dokumentalaren proiektua aurkeztuko dute Aieteko Bakearen Etxean.