Juan Karlos Izagirrek zinegotzi izateari utzi dio
"Hauteskundeetako emaitzek garbi esan dute, herriak beste gobernu bat nahi du”, adierazi zuen alkate ohiak.
Juan Karlos Izagirre EH Bilduko zerrendaburuak zinegotzi izateari utzi, eta mediku lanetara, Osakidetzara, itzuliko zela jakinarazi zuen: “Ez naiz zinegotzi izango, baina honek ez du esan nahi politikatik noanik, oinarrizko militante izango naiz EH Bildun. Nire ekarpena hobea izango da hala”. Mediku lana faltan botatzen zuela adierazi zuen: “Beti esan dut medikua naizela”.
Hauteskundeetako emaitzek “garbi esan dute, herriak beste gobernu bat nahi du”, adierazi zuen Izagirrek, eta berak donostiarren nahia entzun duela esan zuen: “Proiektua da garrantzitsuena eta ez pertsona”. Donostiarrek egoera zailenetan emandako babesa azpimarratu zuen.
Datorren alkateari herritarrekin goberna dezala eskatu zion Izagirrek: “Politika beste modu batera egin daiteke”. Gauzak zeudena baina hobe utzi dituztela adierazi du, “zorrik gabe eta proiektu askorekin, hala nola, Donostia 2016, Tabakalera eta autobus geltoki berria”.
Aldaketa “hitzetatik ekintzetara” eramateko konpromisoarekin hartu zuen alkate kargua Juan Karlos Izagirrek (Igeldo, 1963) 2011ko ekainean. IRUTXULOKO HITZAk hauteskunde kanpainaren harira egindako egindako elkarrizketa batean aitortu zuen ilusioz egindako bidea izan dela: “Krisi garaian iritsi ginen gobernura, eta nahiz eta gutxiengoan gobernatu, inguru nahiko bortitzean, eta, hainbat ezbeharrei aurre egin behar izan arren, hiri honek aurre egin dio krisiari. Datorren urteak erabakigarriak izango dira, baina hiritarrekin egin dugu politika, eta hori nabaritu dutela uste dut. Nahiz eta une gogorrak pasa, oso pozik nago”. Duela lau urte hasitako proiektuari segida eman nahi zion EH Bilduk maiatzaren 24aren ondoren ere, “ezkerreko politikak eginez, behetik gora, eta parte hartzea bultzatuz”.

