Oiartzun pastela

Irutxuloko Hitza

2018/02/16

Oiartzun pastela. (Argazkia: Iñaki Agirre)

OSAGAIAK – Txokolatea – Idiazabal gazta – Masusta purea – Intxaurrak – Gelatina – Esne-gaina – Arrautza – Gurina – Irina – Azukrea PRESTAKETA Jendeari gehien gustatu ohi zaizkion zaporeak batuz sorturiko pastela da Oiartzun: txokolatea, gazta eta masusta. Txokolatea, gurina, arrautza, irina, azukrea eta intxaurrak nahasiz browniea egiten hasi behar da lehenik. Labean egositako gazta krema batekin lagunduko da gero postrea. Horretarako, Idiazabal gazta erabiliko da, zaporea ondo nabaritu dadin eta postreak bertako nortasuna izan dezan. Krema egiteko, esne-gaina, arrautza eta azukrea gehitzen zaizkio gaztari, nahasketa ordu erdiz labera sartu baino lehen. Lehenengo bi zatiak edukita, masusta gelifikatua gehitzea faltako litzateke soilik. Masusta purea irakiten jarri behar da horretarako, gero gelatina eta azukrea gehitzeko. Pastelaren hiru atalak bata bestearen gainean ipinita daudelarik, hozkailuan sartu behar da postrea, sendotasuna lortu dezan. Azkenik, txokolate kapa fin bat gehitu behar zaio zerbitzatzeko prest egon dadin

David Martin, Oiartzun pasteldegiko gozogilea

“Betiko postreez gain gauza berriak egiten saiatzen gara”

David Martin gozogilea. (Argazkia: Iñaki Agirre)

Jaio zenetik pastelen artean hazi dela esaten du David Martin (Donostia, 1979) gozogileak. Bere aitak 1972an ireki zuen Oiartzun gozotegia, Andaluziako nekazaritza mundutik ihes egin eta Moron de la Fronteratik Donostiara etorri zenean. Ijentea kalean duten saltokirako gozoak prestatzen ibiltzen da Martin, goizero, Egiako euren gozogintza lantegian.

Nolakoa da gozogilearen egunerokotasuna? Asko aldatu da denborarekin. Lehen gaueko hamarretan hasten ziren lanean. Orain goizeko laurak eta seiak artean hasten gara, ekoizpenaren arabera. Errege edo San Sebastian egunetan, ordea, gauerditik ibili ohi gara hemen, gau osoan zehar.

Zein produktu lantzen dituzue? Gozogintzari dagozkion guztiak.

Eta zer saltzen da gehien? Txokolatea duen guztia. Gero eta gehiago gainera. Gipuzkoan tradizional samarrak gara postreekin, ezin ditugu oso zapore bereziak erabili jendea ez baita asko animatzen. Gauza arraroa da hori, sukaldaritzan jendea denetarik probatzera animatzen delako. Gozogileok, ordea, ez dugu bide berriak irekitzea lortu. Pena bat da niretzat, lurraldean gastronomiak duen garrantzia ikusita. Betiko postreez gain, gu gauza berriak egiten saiatzen gara hala ere.

Zein da gozogile onaren sekretua? Lehengai onak izatea eta hauek ongi lantzen jakitea. Eskarmentu handia behar da horretarako, jakina.

Donostiako zein leku gomendatuko zenituzke? Groseko Galerna jatetxea eta, gozogileentzat, ireki berri duten Le Paries gozotegi frantsesa.