Hamar pertsonen erosketekin bildutako plastikoa. (Argazkia: Iñaki Agirre)
Plastikozko poltsarik gabeko Nazioarteko Eguna dela eta, herritarrez osaturiko Plis, Plast Barik taldeak ekintza adierazgarri bat burutu zuen atzo Groseko supermerkatu baten atarian. Taldeko hamar pertsonek erosketa arrunta egin zuten dendan, era guztietako jakiak erosiz, eta eskuratutako produktuen bilgarri eta edukiontzi plastikoak supermerkatuaren parean ipinitako hiru erosketa-orgetan bildu zituzten.
Ekintzarekin herritarrek egunerokotasunean inolako zentzurik gabe kontsumitzen duten plastiko kopuru handia irudikatu nahi izan dute, orgen edo telazko poltsen erabilera aldarrikatzearekin batera. Donostian eratu den talde hau Europa mailako Nasti de plastic mugimenduaren baitan sartzen da, eta datozen asteetan plastikoaren arazoa plazaratzen jarraitzeko asmoarekin ekintza gehiago antolatuko dituztela adierazi dute.
IRUTXULOKO HITZA taldeko kide batekin bildu da plastikoaren kontsumo masiboari buruz hitz egiteko eta gaiaren inguruko erreportajea argitaratuko du ostiralean.
