Parrilada, saltsa sekretuarekin

Irutxuloko Hitza

2018/07/06

Jolas-Etxea jatetxeko parrilada. (Argazkia: Irati Salsamendi)

OSAGAIAK – Oilasko izterra – Odolkia – Txorizo kreolea – Txahal saiheskia – Txerri saiheskia – Txerri azpizuna – Sekretu iberikoa – Patata frijituak PRESTAKETA Erritual kutsua du plater honen prestaketak, izan ere, prozesu sinplea dirudien arren, arretaz eta mimoz egiten du pausu bakoitza sukaldariak, haragia bere puntuan egoteko. Suak berebiziko garrantzia dauka plater honen elaborazioan, eta txingarra egitea da sukaldariak ematen duen lehen pausoa. Horretarako, ikatza eta egurra erabiltzen ditu, eta sua pizten duenetik, brasa egokia sortu arte ordu erdi inguru pasatzen da. Sugarra txikitu denean, eta txingarra prest dagoenean, haragi zati bakoitza hiru edo lau zentimetroko tartearekin kokatzen du parrilan. Denbora baten ondoren, pintza batzuk baliatuz eta haragi zatien alde bat ondo txigortu dela ziurtatu ondoren, buelta ematen die, beste aldea ere egin dadin. Haragia parrilatik atera aurretik, sukaldariak azken ukitua ematen dio, Jolas Etxeko sukaldean prestatutako saltsa sekretua botatzen dio gainetik, alegia. Azkenik, haragia platerean jarri eta patata frijituez laguntzen du.

Kepa Miranda eta Kepa Miranda, Jolas-Etxea jatetxeko aita-semeak

Miranda aita-semeak, Jolas-Etxea jatetxeko arduradunak. (Argazkia: Irati Salsamendi)

Duela hamaika hilabete suertatu zitzaien Añorgako Jolas Etxea jatetxea kudeatzeko aukera Miranda aita-semeei. Lehen hilabeteetan, semea ibili zen jatetxea eramaten, aurretik zeuden langileekin batera, eta bosgarren hilabetetik aurrera, aita batu zen proiektura.

Mirandatarren sukaldaritzak berritasun ukitua eman dio jatetxeari, baina biak Añorgakoak izanik, ondo asmatu dute auzoaren esentzia mantentzen. Etxean bezala sentituko dira bertaratzen diren bezeroak.

Nola sortu zitzaizuen Jolas Etxea hartzeko ideia? Gure familiak beste jatetxe bat zeukan auzoan, eta bertan jaio eta hazi naiz ni. 18 urte nituenetik ibili naiz ostalaritzan lanean, eta aitak ere eskarmentua du sektorean. Betidanik begiz jota geneukan lekua, eta Añorga Kirol Elkartearen bitartez izan genuen proiektua hartzeko aukera.

Zein da zuen eskaintza? Astelehenetik ostiralera eguneko menua daukagu, lau lehenengo plater aukeran, beste lau bigarren plater, eta edaria eta kafearekin. Astebukaeran bi eskaintza izaten ditugu. Alde batetik, asteburuko menua daukagu, 18 euroan, eta honetan platerek lanketa handiagoa izaten dute. Beste aldetik, parrila pizten dugu ostiral, larunbat eta igandeetan eta bertan oilasko errea eta parriladak egiten ditugu.

Donostiako zein jatetxe gomendatuko zenuke? Oso zaila da hori erabakitzea, baina eguneko menua jateko Lukainkategi jatetxea gomendatuko nuke. Zerbait desberdina jan nahi duenari Xarma jatetxera joateko esango nioke, eta produktuaz gozatu nahi duenari, Portuetxe jatetxera.