Infernua eremuak 500 etxebizitza inguru izango ditu
Donostiako Udalak Infernuaren Hiri-Antolamenduko Plan Orokorraren aldaketari hasierako onarpena eman dio. Bizitegi eta zerbitzuen auzo bihurtzea du helburu udalak.
Aldaketak bi eremu proposatzen ditu. Batetik, erabilera tertziarioko gunea –hirugarren sektoreari begirakoa–. Zuatzura doan Zubiberri bidearekin lotura zuzena izango luke, eta han zerbitzu berriak jarriko dituzte. Esaterako, Nazaret zentroaren egoitza berria. Bestetik, zerbitzu gune horren eta ibilgailuen kontzesionarioaren artean bizitegi eremua egongo da. Han, 500 etxebizitza inguru izango ditu, horietatik %60 babes ofizialekoak.
Bestalde, gaur egun norabide aldaketa egiteko eremuan biribilgune berri bat egingo dute trafikoa arintzeko. Plan Orokorraren aldaketak ere aurreikusten du Añorgako ubidea berreskuratzea. Ubidearen ondotik parke bat egiteko asmoa du udalak.
