50. urteurreneko festarekin bat eginez
Zurriola ikastolaren festa ospatuko dute, bihar. Egun osoko egitarauarekin batera, ekitaldi berezia egingo dute eguerdian ikastolako familiak omentzeko.
Zurriola ikastolaren egunean ikasle, irakasle zein guraso asko elkartzen dira Groseko eraikinean. 
Urtero egiten dute Zurriola ikastolaren eguna. Biharkoa, ordea, bereziagoa izango da. Izan ere, ikastolaren 50. urteurrena ospatzen ari dira. Ohiko egun osoko egitarauarekin batera, ekitaldi berezi bat egingo dute Hurrako areto nagusian, 12:00etan. Ikastola 1968an abiatu zuten hainbat familiak, eta azken 50 urteotan Zurriola osatu duten eta osatzen ari diren familia guztiak omenduko dituzte. Urriaren 8an irakasle aitzindariei egindako omenaldiari, eta ikasleekin batera egindako ekintzei jarraipena emango diete.
Ekitaldian parte hartzera gonbidatu dituzte Zurriolakide guztiak. Omenaldiaren ostean, Zurriola Ikastola 1968-2018, Kultura ereiten dokumentala eskainiko dute areto nagusian.
Goizetik iluntzera
50 urteko ibilbidea beteta, Zurriola ikastolak hogeita bigarren jaia ospatuko du bihar, Guztiok, guztiona, guztiontzat lelopean. Urtez urte egitarau zabala prestatu izan dute, eta aurtengoa ez da gutxiagorako izango. Jarduera asko antolatu dituzte goizetik iluntzera.
Festa 10:30ean hasiko da. Hurrako egoitzan, eta jarraian ikastolako dantza taldeak emanaldia eskainiko du. Haur eta gazteentzako puzgarriak, trena, futbolina eta beste egongo dira egun osoan zehar. Egurrezko jolasak eta haurrentzako jolasak ere egingo dituzte.
Emanaldi eta ikuskizunei dagokienez, goizekoarekin batera beste hainbat egongo dira. Gimnastika erritmikoko taldeak ikuskizuna eskainiko du hip hop doinuekin (11:15). Hamar urte bete dituen Tomaxen abenturak antzezlanaren emanaldi berezia egingo dute. Joserra Fachado eta Oihana Maritorena taula gainean ariko dira (12:15). Goazen! telesaileko kideak ere ikastolan izango dira. 19:00etan eskainiko dute dantza ikuskizuna. Azkenik, ikastolako gurasoek osaturiko Zirriborro Jazz Band taldeak kontzertua emango du (19:00).
Egitaraua osatuko dute, besteak beste, herri bazkariak (13:30), bingoak (15:00), Zurriolaokeak (16:00), Zumba dantzaldiak (19:00), buruhandiek (19:45), bukaerako musika dantzaldiak (20:00) eta zezensuzkoak (20:45).
