Motorrak ongi berotuta egingo dute korrika Amara Berrin
Maiatzean zehar entrenatzen aritu ostean, larunbateko VI. AB Krosan marka aparta egingo dute Amara Berrikoek. Aurten ere, haur zein helduentzako plan paregabea eskainiko du jada tradizio bilakatu den lasterketak.
AB Krosakoek Sudur Krosaren egunean aurkeztu ohi dute Amara Berriko probaren kartela. (Argazkia: AB Krosa) Berritsu auzo elkarteko kideek gogotsu antolatu dute aurten ere auzoko kirol-proba ezaguna, jakin badakitelako auzotar ugari lasterketaren zain dauzkatela. Ikusi besterik ez zegoen nola bildu diren hainbat arratsaldetan Amara Berri eta Loiolako Erribera arteko ibilbidean entrenatzeko.
Zorionez, runner porrokatu [eta ez hain porrokatu] horiek dena prest topatuko dute larunbatean. Izan ere, Probestu plazan arratsalde paregabe batez gozatzeko aukera izango dute haur zein helduentzako egitarauarekin.
Txikiak izango dira korrika egingo duten lehenak. 17:00etan Ernest Lluch kultur etxeko Haurtxokoko lagunak lasterketa gunera joango dira, gaztetxoei euren dortsalak marrazten laguntzeko. 18:00etan, berriz, ibilbideko irteeran kokatuko dira lasterkariak, Probestu plazan zehar ziztu bizian korrika egiteko.
Nahikoa izerditu ostean, merienda paregabe batekin berreskuratuko dituzte indarrak, helduek luzaketak egiten dituzten bitartean. Izan ere, 19:00etan haiei tokatuko zaie lasterka aritzea; aukeran dituzte 3 kilometroko eta 6 kilometroko ibilbideak.
Azkarrak izateko arrazoirik ez zaie falta, helmuga gurutzatuko duen lehen auzotarrek Irutxuloko Hitzaren urtebeteko harpidetza irabaziko baitute. Gainerako guztiek ere ez dute dena galdua izango, lasterkarien artean opari berezi mordoa zozkatuko dutelako.
Proba osteko luntxean, auzoko tabernek eskainitako oturuntza dastatu eta elkar zoriontzeko astia izango dute parte hartzaileek, Eraul Duo taldearen kontzertu akustikoaz gozatu aurretik. Gainera, gaualdera edari isotonikoen ordez beste zerbait edatea nahiago dutenek txosna txiki bat ere izango dute plazan.
Lasterketa herrikoian parte hartu nahi dutenek dortsala Internet bidez eskuratzeko aukera daukate ostiral gauera arte, www.herrikrossa.eus webgunean. Azken unera arte zalantzan egon ohi direnek, berriz, larunbatean eman ahalko dute izena Probestu plazan bertan.
