Aste Nagusiko egitarauak: abuztuak 12, astelehena
Donostiako Piratek egun handienetako bat dute gaur: Abordatze Eguna. Udalak prestatutako egitarauan, aldiz, kirol jarduera ugari egongo dira gaur.
Abordatze Eguneko bi parte hartzaile. (Argazkia: Mikel Goñi) 
Aste Nagusiko hirugarren egunean eguraldiak tregoa txiki bat egingo duela dirudi, eta donostiarrek antolatutako hamarnaka jarduerekin gozatzeko aukera izango dute. Euskalmeten arabera, zerua hodeitsu egongo da, tarteka “oso hodeitsu”, eta zaparrada txikiak botako ditu, bereziki goizean.
Donostiako Piratek Aste Nagusi Piratako egun potoloenetako bat dute gaur: Abordatze Eguna. Urtero bezala, “kortsarioen Donostia” abordatuko dute ehunka piratek, eta goiztiarrenak hasi dira dagoeneko baltsak muntatzen. Antolakuntzako pirata asko ere goizean goiz hasi dira kaian lanean, egun handiari forma emateko. Eguerdian herri bazkaria egingo dute Kaimingaintxo plazan, eta 17:00etan abordatzearen hasierako txupina botako du Ezkila kapitainak. Pirata guztiak Kontxa hondartzara iristean, kalejiran joango dira Flamenkara, eta han McOnak taldeak kontzertua egingo du. Gauean honako kontzertuak egongo dira: Physis versus Nomos eta Bi Zaldi Trinitate plazako gunean, eta Xavi Sarria eta Ze Esatek! Flamenkan.
Dono$tia abordatzeko eguna iritsi da eta piratak euren baltsak muntatzen hasi dira jada kaiko arrapalan!
— Donostiako Piratak (@izanpirata) August 12, 2019
Guztira 203 baltsa eta 1.500 lagun baino gehiago izango dira gaurko Abordatzean #ANPirata19 #IzanPirata #AbordatzePirata pic.twitter.com/UeNkDYxgtX
Udalak prestatutako eguneko lehen jarduera Antiguan egiten ari dira, Benta Berriko kiroldegiko estali gabeko pistetan, hain zuzen. 10:00etan hasi dute Futbol 5 txapelketa azkarra, eta 13:00etan amaituko da. Trinitate plazan ere kirol jarduera batekin hasi dute eguna, izan ere, Euskal pilotako hastapen ikastaroa antolatu dute, eta ondoren, Barrenea egingo dute. Besteak beste, Goizaldi Dantza taldeak dantza erakustaldia egingo du Konstituzio plazako oholtzan, eta Hombres G pop musika taldea izango da Saguesen.
Egitarau oparoa prestatu dute Donostiako Piratek Aste Nagusi Piratarako. Egun bakoitzeko programak jaso ditugu, egunez egun. Bestalde, Donostiako Udala prestatutako egitaraua egunez egun kontsultatzeko aukera eskaintzen du Aste Nagusiko wegbuneak.
