Arte Ederretako eraikinaren fatxada. (Argazkia: Inaxio Esnaola) Eneko Goia alkateak begi onez ikusten du Arte Ederretako eraikina birgaitzeko SADEk udalari aurkezturiko proiektua. “Eraikinak duen babes mailaren barruan dago proposamena”, adierazi du Goiak. Tokiko Gobernu Batzordearen osteko prentsaurrekoan eman du albistea. SADEk eraikinaren egungo elementuak mantentzeko borondatea duela esan du alkateak, eta hori “baikorra” dela.
Birgaitze proposamenak ez du zehazten SADEk zein erabilera eman nahi dion eraikinari, baina hirugarren sektoreari loturikoa izango dela aurreikusten da. Udalak proposamena ontzat ematen badu, aurrera begira lizentzia emango lioke eraikinaren jabeari. “Egoera desblokeatu dezakeela uste dut, eta hori da nik nahiko nukeena”.
Arte Ederren eraikinaren aferak udalaren eta SADEren arteko talka azaleratu du. Bi aldeek epaitegietara jo dute, eta azken ebazpenak udalaren aldekoak izan dira. Azkena, ekaina hasierako da. Arte Ederren eraikina SADEk konpondu behar duela ebatzi zuen EAEko Auzitegi Nagusiak.
15 urtez, Donostia bere hartan erakutsi du IRUTXULOKO HITZAk. Argi dugu kalitatezko eta gertuko edukia eskaintzen jarraitzea dela gure ardura oraingo egoera zail honetan ere. Horregatik, etxetik bada ere, donostiarrontzat etengabe lanean jarraitzen dugu!
Baina bide honetan segitzeko, ezinbestekoa da zure konpromisoa, zuek ere HITZA hartzea.
