Musika, dantza eta txistu emanaldia egingo dute igandean Aieten, Eskola-Gurutziagaren 25. urteurrena dela eta
Eskola-Gurutziaga abesbatzako kideak.
Aieteko jauregiko harmaila musikaz, dantzaz eta txistuz beteko da igande eguerdian. Izan ere, Donostiako Udalaren Txistulari taldeak, Eskola dantza taldeak eta Eskola-Gurutziaga abesbatzak emanaldia egingo dute 12:00etan, koruaren 25. urteurrena ospatzeko. Errepertorioa hiru zatitan banatu dute: lehenik, abesbatzak Uruñuelaren Maitia nun zira eskainiko du; ondoren, Juan Jose Juanjo Oconen Agurra abestu, dantzatu eta joko dute; azkenik, abesbatzak eta txistulariek Txanton Piperri eta Euskal Herriko abestien aria egingo dute.
Kontzertu hau abesbatzaren 25. urteurrena dela eta egiten duten lehenengoa da, hasiera batean antolatutako egitaraua koronabirusaren egoerara egokitu behar izan baitzuten. Kontzertuez haratago, argazki erakusketa txiki bat jarri dute Aiete Kultur Etxean, koruaren ibilbidea errepasatzen duena. IRUTXULOKO HITZAk erreportaje bat argitaratu zuen Eskola-Gurutziagaren historiaz eta 25. urteurrenaz.
