Antso Jakitunaren hiribidea lanak hilabete barru bukatuko dituzte
Antso Jakituna hiribideko lanak. (Argazkia: Donostiako Udala) 
Urtebeteko lanen ondoren, Antso Jakitunaren etorbidea berrurbanizatzeko lanak azaroaren erdialdean bukatuko dituzte. Bakoitien espaloiak irudi berri bat izango du, 11 metroko zabalera duen oinezkoentzako korridore batekin. Eserlekuak eta lorategiak, aparkalekuak eta berdegune berriak ere jarri dituzte, espaloia trafikotik aldentzeko. Antso Jakitunaren obra iazko irailean hasi zen, eta 1,3 milioi euroko inbertsioa izan du.
“Hirugarren etxe uhartea bukatzea geratzen da, Pio XII.aren plazatik gertuen dagoena, eta loreontziak eta hiri altzarien beste elementu batzuk jarri dira bertan. Bien bitartean, bigarren espaloian lan egiten da, erdikoan, besteak baino beranduago hasi zena, jabeetako batekin izandako desadostasunengatik”, azaldu du Hiri Proiektuen zinegotzi Marisol Garmendiak.
Lorezaintza lanak egitea eta farola berriak jartzea falta da. Gainera, espaloiaren erdian dagoen erregistro kaxa bat beste gune diskretuago batera eramango da. Erregistro honek Pio XII.aren argi iturriaren funtzionamendua kontrolatzen du. “Askoz ere diseinu garbiagoa da, pasealekua errazten du, egonaldirako gonbita egiten du eta hiribidearen merkataritza eta ostalaritza jarduerei bultzada ematen die”, gaineratu du Garmendiak.
