Morlansko igogailua hondatzen denean jakinarazteko alerta sistema bat aztertzen ari da udala
(Argazkia: Donostiako Udala) 
Morlanstarrak auzo elkarteak prentsaren bidez izan du udalaren asmoen berri. Aste honetako udal batzordeetako batean, Morlansko igogailuaren inguruko eskaera bat aintzat hartu zuen udal gobernuak. Hain zuzen ere, aztertzen ari dira Morlansen eta Aieten alerta sistema bat ezartzea, igogailua hondatuta dagoenean auzotarrei jakinarazteko. Eremuan bizi diren bizilagunen aspaldiko eskaera bat da.
Udalaren asmoarekin pozik agertu dira Morlanstarrak auzo elkarteko kideak. Dena dela, azpimarratu dute beraiekin ez direla harremanetan jarri albistea emateko. Horrekin batera, udalak auzo elkartearekin duen harremana ez da auzotarrek nahiko luketeena. Auzotarrek euren iritzia kontua izatea eskatzen diote udalari. Igogailuaren afera honetan, aspaldiko eskaera baten erantzuna prentsa bidez jasotzea ez zaie modurik egokiena iruditu.
