Matigoxotegi futbol zelaia berritzeko lehiaketara deitu du udalak
Petatxuz betea dago Matigoxotegiko zelaia, eta futbolean aritzeko arriskutsua da. (Argazkia: Inaxio Esnaola) 
Atzerapen nabarmenarekin bada ere, Donostiako Udalak Egiako Matigoxotegi futbol zelaia berritzeko pausoa eman du. Lanak egiteko lehiaketara deitu dute, eta hilabete honen bukaerara arte dago zabalik proiektua aurkezteko epea. Lanak adjudikatzean, bi hilabeteko epean bukatu beharko da obra, eta 330.000 eurokoa da aurrekontua.
Kostkas futbol elkarteak denbora darama udalari zelaiko belarra aldatzeko eskatzen. 2020eko aurrekontuetatik kanpo geratuko zela jakitean, 2019ko azaroa bukaeran kalera atera ziren protesta egitera. IRUTXULOKO HITZAk kirol elkartearekin hitz egin zuen. EH Bilduren udal taldeak aurrekontuei aurkezturiko emendakin bati esker, 330.000 euro bideratzea adostu zuten EAJren eta PSE-EEren udal gobernuarekin. Ordea, pandemiak inbertsio hori eten zuen, osasun krisiaren ondorio ekonomikoak argitu arte.
Iazko urte bukaeran, udal gobernuak hamalau milioi euro desblokeatu zituen hainbat proiektu berreskuratzeko. Horietako bat da Matigoxotegi futbol zelaiarena. Horrela, Donostia Kirolak lehiaketa abiatzea erabaki zuen.
